काबुल- अफगानिस्तानको राजधानी काबुलस्थित रक्षामन्त्रालयनजिकै शक्तिशाली ट्रक बम विष्फोट हुँदा कम्तीमा ३४ जनाको ज्यान गएको छ ।

रक्षामन्त्रालयअन्तर्गत इन्जिनियरिङ तथा बन्दोबस्ती विभागको भवननजिकै भएको विष्फोटमा ५१ बालबालिकासहित सयभन्दा बढी घाइते भएका छन् । रक्षामन्त्रालय परिसरनजिकै विष्फोट भएलगत्तै लडाकु समूह र सरकारी सुरक्षा बलबीच भिडन्त शुरु भएको छ ।

ट्रक बम विष्फोट गराई बन्दुकधारीको समूहले मन्त्रालय परिसरभित्र छिर्ने प्रयास गरेपछि भिडन्त भएको हो । बन्दुकधारी समूह मन्त्रालय नजिकैका केही भवनभित्र पसेर अन्धाधुन्ध गोली चलाएको अफगान सञ्चारमाध्यमले जनाएको छ ।

बम विष्फोटन भएको क्षेत्रनजिक अफगान फुटबल महासंघको कार्यालय समेत रहेकाले घाइते हुनेमा फुटबल महासंघका अध्यक्ष पनि रहेको अफगान फुटबल महासंघले जनाएको छ ।

आक्रमणको जिम्मा अफगानिस्तानमा सक्रिय लडाकु समूह तालिवानले लिएको छ ।