काठमाडौं – चलचित्रको व्यापारका हिसाबले सफल अभिनेतामा पर्छन् दीपकराज गिरी । पछिल्लो समय गिरीले अभिनय गरेका फिल्म व्यावसायिक हिसाबले सफल भएका छन् । हालै मात्र उनको टिमले रोहित अधिकारीसँग मिलेर फिल्म ‘छ माया छपक्कै’ निर्माण गर्न लागेको छ ।

शुरुवातका फिल्ममा एउटै नायिका दोहोरिएपछि नायिका दाेहोर्‍याएको आरोप खेपेका दीपकले  पछिल्लो समय भने हरेक फिल्ममा नयाँ नायिका लिने गरेका छन् ।

मंगलवार नायिका पूजा शर्माको जन्मदिन सेलिब्रेसनमा भेटिएका गिरीले पहिले आफूलाई नायिका दोहोर्‍‍याएको भनेर आरोप आएको र अहिले नायिका फेरेपछि धेरै नायिका फेरेको भन्ने आरोप खेपेको बताए । जन्मदिनको भेटघाटमा उनले आफूसँग जोडी भएर अभिनय गरेका नायिकाहरुको छिटै बिहे भएकाले अब केकी अधिकारीको पनि बिहे हुन सक्ने भन्दै रमाइलो गरे ।

‘मसँग बिहे जोडी भएर फिल्म खेलेकाको त बिहे हुन्छ, अब केकीको पनि हुनसक्छ,’ दीपकले ठट्टा गर्दै पूजा शर्मालाई भने ‘तिम्रो पनि बिहे छिटो होस् भन्ने चाहन्छौ भने मसँग फिल्म खेल ।’

पछिल्लो समय नायिका पूजा शर्मा फिल्म ‘सम्हालिन्छ कहिले मन’ को काममा व्यस्त छिन् । यता दीपकराज गिरी ‘छ माया छपक्कै’ छायांकनको तयारीमा छन् ।