पिपरा– महोत्तरीको पिपरा गाउँपालिकाको अध्यक्ष पदका लागि भएको उपनिर्वाचनमा नेपाल कम्युनिस्ट पार्टी (नेकपा) का उम्मेदवार विक्रम चौधरी विजयी भएका छन् ।

मुख्य निर्वाचन अधिकृत विष्णु सुवेदीका अनुसार पिपरा गाउँपालिकाको अध्यक्षमा नेकपाका उम्मेदवार चौधरी ३ हजार २ सय ४९ मत ल्याएर विजयी भए । उनका निकटतम प्रतिद्वन्द्वी समाजवादी पार्टीका उम्मेदवार रामजानकी यादवले ३ हजार ४१ मत ल्याए ।

त्यस्तै राष्ट्रिय जनता पार्टीका उम्मेदवार रविता कुमारीले २ हजार ९८४ मत ल्याएर तेस्रो स्थानमा रहिन् भने नेपाली काँग्रेसका उम्मेदवार विजय यादव १ हजार ९३५ मत ल्याएर चौथो स्थानमा रहे ।

नेकपाका उम्मेदवार चौधरी समाजवादी पार्टीका उम्मेदवार यादव भन्दा २०८ बढी मत ल्याएर विजयी भए। यस अघि २०७४ सालमा भएको स्थानीय तहको निर्वाचनमा यहाँबाट राजपा नेपालले जीत हासिल गरेको थियो ।

गाउँपालिकाका अध्यक्ष विनोद चौधरीको उपचारका क्रममा काठमाडौंमा निधन भएपछि पिपरामा उपनिर्वाचन भएको हो ।