काठमाडौं– नेपाली कांग्रेसका उपसभापति विश्वप्रकाश शर्माले हिजोका र आजका दुवै नेतृत्वप्रति नागरिक निराश रहेको टिप्पणी गरेका छन् ।

सहमहामन्त्री गुरुराज घिमिरेद्वारा लिखित ‘बुद्ध, बीपी र आजका नेता र लिलिपुटका लघुमानव’ पुस्तक विमोचन कार्यक्रममा बोल्दै शर्माले दोषारोपणभन्दा पनि देश किन अपेक्षाअनुसार अघि बढ्न सकेन भन्ने प्रश्नको उत्तर खोज्नुपर्ने बताए ।

‘हिजो नागरिक हामीसँग किन असन्तुष्ट थिए, आज पनि किन निराश छन् ?,’ शर्माले प्रश्न गरे । उनले नेपाली समाजमा दैनिक करिब २० जनाले आत्महत्या गरिरहेको उल्लेख गरे ।

गणेश नेपालीले आत्मदाह गरेको स्मरण गर्दै उनले भने, ‘अहिले पनि गणेश नेपालीले आत्मदाह गरे हिजो प्रेम आचार्यले पनि हाम्रो सरकारमा हुँदा त्यसै गरे । यद्यपि त्यतिबेला पनि उहाँहरुकै गृहमन्त्री हुनुहुन्थ्यो ।’

‘दोषारोपण गर्ने होइन, नेपाल किन बनेन र किन यस्तो भइरहेको छ भन्ने विषयमा गम्भीर समीक्षा गर्ने समय आएको छ, नेपाल कति रूपान्तरण भयो, अब कति यात्रा बाँकी छ, देश किन बनेन र कसरी बनाउन सकिन्छ भन्नेमा केन्द्रित भएर अघि बढ्नुपर्छ,’ उनले भने ।

यस्तै, कांग्रेस नेता बीपी कोइरालाको राजनीतिक संस्कार स्मरण गर्दै उपसभापति शर्माले नेतृत्व हस्तान्तरणको संस्कृतिसमेत आवश्यक रहेको उल्लेख गरे ।

‘बीपी कोइरालाले एक पटक प्रधानमन्त्री भएपछि अर्को पटक आफ्नै साथीलाई प्रधानमन्त्रीका रूपमा अघि सार्नुभयो । राजनीतिमा एउटा उचाइमा पुगेपछि कहिले हात उठाउने भन्ने संस्कार पनि हुनुपर्छ,’ पार्टीका असन्तुष्ट पक्षतर्फ इङ्गित गर्दै उनले भने ।