दोलखा- शैलुङ गाउँपालिकाले शैलुङ डाँडा तथा आसपासका क्षेत्रमा अनुमति बिना निर्माण गरिएका अस्थायी घरटहरा र पसल हटाउन सम्बन्धित पक्षलाई १५ दिनको समय दिएको छ ।

गाउँपालिकाले सार्वजनिक सूचना जारी गर्दै प्राकृतिक सौन्दर्य संरक्षण, फोहोरमैला व्यवस्थापन र पर्यटकीय क्षेत्रलाई व्यवस्थित बनाउने उद्देश्यले अनधिकृत संरचना हटाउने निर्णय गरेको जनाएको हो ।

गाउँपालिकाका अनुसार कालापानी–शैलुङ मिनी ग्रेटवालदेखि शैलुङ डाँडासम्म अनुमति बिना अस्थायी टहरा निर्माण गरी व्यापार सञ्चालन भइरहेको छ । यस्ता संरचनाले क्षेत्रको प्राकृतिक सौन्दर्यमा असर पुर्‍याउनुका साथै फोहोर व्यवस्थापन र पर्यटकीय वातावरणमा समेत समस्या सिर्जना गरेको जनाइएको छ ।

गाउँपालिकाले अब उक्त क्षेत्रमा नयाँ संरचना निर्माण तथा व्यापार सञ्चालनमा रोक लगाएको छ । हाल सञ्चालनमा रहेका अस्थायी टहरा तथा पसलहरू सूचना प्रकाशित भएको मितिले १५ दिनभित्र हटाउन निर्देशन दिइएको छ ।

प्रमुख प्रशासकीय अधिकृत सञ्जिव न्यौपानेद्वारा हस्ताक्षरित सूचनामा तोकिएको अवधिभित्र संरचना नहटाए प्रचलित कानुनअनुसार कारबाही गरिने चेतावनी दिइएको छ ।

यसैबीच, डिभिजन वन कार्यालय दोलखाले पनि वन क्षेत्र अतिक्रमण गरी निर्माण गरिएका संरचना हटाउने तयारी थालेको जनाएको छ । कार्यालयका अनुसार अदालतको आदेश प्राप्त भएपछि डोजर प्रयोग गरी अतिक्रमित संरचना हटाउने प्रक्रिया अघि बढाइनेछ ।

दोलखाको प्रमुख पर्यटकीय गन्तव्यका रूपमा रहेको शैलुङ क्षेत्रमा पछिल्ला वर्ष पर्यटकको चाप बढेसँगै अव्यवस्थित रूपमा अस्थायी संरचना निर्माण र व्यापारिक गतिविधि बढ्दै गएको थियो । गाउँपालिकाले शैलुङलाई स्वच्छ, व्यवस्थित र आकर्षक पर्यटकीय क्षेत्रका रूपमा विकास गर्ने लक्ष्यसहित अभियान अघि बढाएको जनाएको छ ।

यसअघि गाउँपालिकाले चालु आर्थिक वर्षदेखि कालापानी–मिनी ग्रेटवाल हुँदै शैलुङ प्रवेश गर्ने पर्यटकबाट प्रतिव्यक्ति ५० रुपैयाँ प्रवेश शुल्क लिने निर्णयसमेत गरेको छ । उक्त रकम फोहोर व्यवस्थापन, प्राकृतिक सम्पदा संरक्षण, पूर्वाधार विकास तथा पर्यटन प्रवर्द्धनमा खर्च गरिने गाउँपालिकाले जनाएको छ ।