काठमाडौं– जिल्ला प्रशासन कार्यालय काठमाडौंले मनसुनका कारण भारी वर्षा हुनसक्ने भन्दै उपत्यका प्रवेश गर्ने र बाहिरिने यात्रुलाई विशेष सतर्कता अपनाउन आग्रह गरेको छ ।

प्रशासनले यात्रा सावधानी (ट्राभल अलर्ट) जारी गर्दै बाढी, पहिरो तथा सडक अवरोधको जोखिमलाई ध्यानमा राखेर यात्रा गर्नुअघि मौसम र सडक अवस्थाबारे जानकारी लिन अनुरोध गरेको हो ।

विशेषगरी रातको समयमा यात्रा गर्दा उच्च सतर्कता अपनाउन, सडक अवरुद्ध भए सुरक्षित स्थानमा मात्र रोक्न र प्रहरी प्रशासनबाट बाटो खुलेको यकिन जानकारी पाएपछि मात्रै यात्रा अघि बढाउन आग्रह गरिएको छ ।

काठमाडौं उपत्यकाका चारैतर्फका नाकाबाट आवतजावत गर्ने निजी तथा सार्वजनिक सवारी साधनका चालक, सहचालक र यात्रुलाई प्रशासनले सावधानी अपनाउन अनुरोध गरेको हो ।