काठमाडौं– पर्वतको कुश्मामा ट्याक्टर दुर्घटना हुँदा चालकसहित दुई जनाको मृत्यु भएको छ भने एक जना घाइते भएका छन्।

जिल्ला प्रहरी कार्यालय पर्वतका अनुसार शनिबार दिउँसो साढे २ बजेतिर कुश्मा नगरपालिका–९ एकोहोरे पाठास्थित दोबिल्ला–फलेवास सडकखण्डमा ग १ त ७२७३ नम्बरको ट्याक्टर दुर्घटनामा परेको हो।

कुश्माबाट साइकलचोकतर्फ जाँदै गरेको ट्याक्टर अनियन्त्रित भई सडकबाट करिब १०० मिटर तल खसेको प्रहरीले जनाएको छ।

दुर्घटनामा कुश्मा नगरपालिका–७ का २८ वर्षीय ट्याक्टर चालक सुजन नेपाली र कुश्मा–९ साइकलचोकका १४ वर्षीय शिशिर लामिछानेको मृत्यु भएको छ। गम्भीर घाइते भएका दुवै जनाको प्रदेश अस्पताल कुश्मामा उपचारका क्रममा मृत्यु भएको प्रहरीले जनाएको छ।

दुर्घटनामा स्याङ्जाको अर्जुनचौपारी गाउँपालिका–५ का २२ वर्षीय उदय सापकोटा घाइते भएका छन्। हाल कास्कीको पोखरा महानगरपालिका–१७ बिरौटामा बस्दै आएका सापकोटाको प्रदेश अस्पताल कुश्मामा उपचार भइरहेको छ।