काठमाडौं- नेपाल प्रिमियर लिग (एनपीएल) फ्रेन्चाइज टोली सुदूरपश्चिम रोयल्सले शुक्रबार आगामी सिजनका लागि आफ्नो व्यवस्थापन टोली सार्वजनिक गरेको छ।

टोलीले लगातार दोस्रो संस्करणका लागि युवा खेल प्रशासक सुनिल थापालाई टिम म्यानेजरको जिम्मेवारीमा निरन्तरता दिएको हो।

२६ वर्षीय थापा पछिल्ला केही वर्षदेखि नेपाली क्रिकेटको व्यवस्थापन र विकास क्षेत्रमा सक्रिय रहँदै आएका छन्। उनी स्वयं पनि क्रिकेट खेलाडी रहिसकेका छन् भने विभिन्न राष्ट्रियस्तरका क्रिकेट प्रतियोगिताको सफल व्यवस्थापन गर्दै खेल प्रशासनमा अनुभव हासिल गरेका छन्।

थापाले बीबीए कप क्रिकेटदेखि कलेज क्रिकेट लिगसम्मका प्रतियोगिता सञ्चालन तथा व्यवस्थापन गरिसकेका छन्। क्रिकेट व्यवस्थापन क्षेत्रमा थप दक्षता अभिवृद्धि गर्ने क्रममा उनले राजस्थान रोयल्सबाट स्पोर्ट्स म्यानेजमेन्टसम्बन्धी विशेष प्रशिक्षणसमेत पूरा गरेका छन्।

उनको अनुभव, नेतृत्व क्षमता र व्यवस्थापकीय दक्षतालाई मूल्यांकन गर्दै सुदूरपश्चिम रोयल्सले उनलाई दोस्रो सिजन पनि टोली व्यवस्थापकको जिम्मेवारी दिएको जनाएको छ।

सुदूरपश्चिम रोयल्सले नयाँ सिजनका लागि व्यवस्थापन टोलीलाई थप मजबुत बनाउने उद्देश्यसहित अनुभवी र दक्ष व्यक्तिहरूलाई निरन्तरता दिएको बताएको छ। टोलीले आगामी एनपीएल संस्करणमा उत्कृष्ट प्रदर्शन गर्दै उपाधि जित्ने लक्ष्यका साथ तयारीलाई तीव्र बनाइरहेको जनाएको छ।