काठमाडौं- गायक तथा कलाकार दुर्गेश थापाको आगामी चलचित्र ‘मास्टर्नी’ मा समावेश ‘ताराबाजी लै लै’ बोलको गीत प्रतिबन्ध लगाउन सञ्चार तथा सूचना प्रविधि मन्त्रालयमा निवेदन दर्ता गरिएको छ।

तनहुँको व्यास नगरपालिका–११ स्थित वाराही माध्यमिक विद्यालयका शिक्षक रमेशबहादुर भट्टराईले शुक्रबार उक्त गीत प्रतिबन्ध लगाउन मागसहित मन्त्रालयमा निवेदन दर्ता गरेका हुन्।

उक्त गीतले समग्र शिक्षक समुदाय, विशेषगरी महिला शिक्षक तथा शिक्षण पेशाको मर्यादामा आँच पुर्‍याएको दाबी उनले गरेका छन्।

निवेदनमा गीतका शब्दहरू शिक्षक समुदायप्रति अपमानजनक, अमर्यादित तथा नेपाली संस्कृति भड्काउने प्रकृतिका रहेको उल्लेख गर्दै तत्काल प्रतिबन्ध लगाउन माग गरिएको छ।

भट्टराईले सञ्चार तथा सूचना प्रविधि मन्त्रालयका सचिवलाई सम्बोधन गर्दै दिएको निवेदनमा गीतले शिक्षण पेशाको गरिमा घटाउने खालको सन्देश प्रवाह गरेको उल्लेख गरिएको छ।