काठमाडौं- वैदेशिक रोजगारसम्बन्धी कसुर मुद्दामा फरार रहेका दुई प्रतिवादीलाई प्रहरीले पक्राउ गरेको छ।

केन्द्रीय प्रहरी समाचार कक्षका अनुसार पक्राउ पर्नेमा ललितपुर महानगरपालिका–२ इमाडोल बस्दै आएका र रूकुम पश्चिमको मुसिकोट नगरपालिका–३ स्थायी घर भएका ४७ वर्षीय रामचन्द्र खड्का तथा काठमाडौँको बूढानीलकण्ठ नगरपालिका–पासीकोट बस्दै आएका र रूकुम पूर्वको पुथा उत्तरगङ्गा गाउँपालिका–८ स्थायी घर भएका ४८ वर्षीय पूर्णबहादुर मल्ल रहेका छन्।

प्रहरीका अनुसार वैदेशिक रोजगार न्यायाधिकरणबाट गत जेठ ११ गते पक्राउ अनुमति जारी भएपछि फरार रहेका खड्कालाई काठमाडौँ उपत्यका अपराध अनुसन्धान कार्यालयको टोलीले ललितपुरको इमाडोलबाट पक्राउ गरेको हो।

त्यसैगरी, वैदेशिक रोजगारसम्बन्धी मुद्दामा जिल्ला अदालत ललितपुरबाट पक्राउ पुर्जी जारी भई फरार रहेका मल्ललाई प्रहरीले बूढानीलकण्ठबाट नियन्त्रणमा लिएको जनाएको छ।

पक्राउ परेका खड्कालाई आवश्यक अनुसन्धान तथा कारबाहीका लागि वैदेशिक रोजगार विभाग पठाइएको छ भने मल्ललाई थप कानुनी प्रक्रिया अगाडि बढाउन जिल्ला प्रहरी परिसर ललितपुर पठाइएको प्रहरीले जनाएको छ।