काठमाडौं– अर्थमन्त्री डा.स्वर्णिम वाग्लेले बदलिँदो राष्ट्रिय प्राथमिकता र विकास आवश्यकताअनुसार सरकारले संयुक्त राष्ट्रसङ्घीय विकास कार्यक्रम (युएनडीपी)सँगको सहकार्यलाई थप प्रभावकारी बनाउन चाहेको बताएका छन्।

नेपाल र युएनडीपीबीच विकास सहकार्य सुरु भएको ६०औँ वर्षगाँठका अवसरमा बुधबार काठमाडौँमा आयोजित कार्यक्रममा उनले विगत ६ दशकदेखि गरिबी निवारण, असमानता न्यूनीकरण, शिक्षा, स्वास्थ्य, दिगो विकास, वातावरण संरक्षण, लोकतन्त्र सुदृढीकरण, युवा सशक्तीकरण र डिजिटल रूपान्तरणलगायत क्षेत्रमा युएनडीपीले पुर्‍याएको योगदानको प्रशंसा गरे।

अर्थमन्त्री वाग्लेले विकास सहकार्यलाई केवल लगानीको दृष्टिले मात्र नभई अन्तरदेशीय सहकार्य, साझेदारी र समन्वयको महत्वपूर्ण माध्यमका रूपमा हेर्नुपर्ने बताउँदै आगामी दिनमा पनि नेपाल–युएनडीपी सहकार्य अझ सुदृढ हुने विश्वास व्यक्त गरे। उनले ६० वर्ष पुगेको साझेदारी १०० वर्षसम्म निरन्तर रहोस् भन्ने शुभकामना पनि व्यक्त गरे ।

उनले आफूले पनि जीवनको महत्वपूर्ण समय युएनडीपीसँग बिताएको स्मरण गर्दै संस्थाप्रति आभार व्यक्त गरे।

कार्यक्रममा अर्थमन्त्री वाग्लेले युएनडीपीले नेपालमा गरेका कार्यहरूको तस्बिरसहित समेटिएको ‘६० वर्षको सहयात्रा’ नामक फोटो पुस्तक पनि सार्वजनिक गरे।