काठमाडौं– देशभर एकै दिनमा भएका विभिन्न विपद्का घटनामा परी ७ जनाको मृत्यु भएको छ । 

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार आइतबार देशका ४४ जिल्लामा ५५ वटा विपद्का घटना दर्ता भएका छन् । उक्त अवधिमा १९ जना घाइते भएका प्राधिकरणले जनाएको छ । घटनामा २५६ परिवार प्रभावित भएका छन् ।

सबैभन्दा बढी २० वटा पहिरोका घटना भएका छन्, जसमा २ जनाको मृत्यु, ५ जना घाइते तथा ७० परिवार प्रभावित भएका छन् । यस्तै १५ वटा सर्पदंशका घटनामा ३ जनाको मृत्यु भएको छ ।

बाढीका १३ घटनामा २ जनाको मृत्यु र १ जना घाइते भएका छन् भने ६९ परिवार प्रभावित भएका छन् । आगलागीका ३ घटनामा १ जना घाइते र ११ परिवार प्रभावित भएका छन् । यस अवधिमा चरम वर्षाका कारण भएको क्षतिबाट करिब रु २५ लाख २५ हजार बराबरको आर्थिक क्षति भएको प्राधिकरणले जनाएको छ ।

प्राधिकरणका अनुसार उक्त दिन सडक अवरोध र चौपाया क्षतिका घटना भने दर्ता भएका छैनन् । विपद्का घटनापछि उद्धार तथा राहतका लागि सम्बन्धित निकाय परिचालन गरिएको जनाइएको छ ।