काठमाडौं- कीर्तिपुर नगरपालिका–१० सुन्दरीघाटस्थित राधास्वामी होल्डिङ सेन्टर डुबानमा परेपछि त्यहाँका सुकुम्वासीलाई सरकारले भक्तपुरमा सारेको छ।

सरकारले कीर्तिपुरको उक्त होल्डिङ सेन्टरबाट भक्तपुरको खरिपाटीमा ३१ घर परिवारका ८९ जनालाई सारेको हो।

शनिबार र आइतबार बिहान दुई दिन गरेर उनीहरूलाई खरिपाटी लगिएको हो । केही सुकुम्वासीलाई भक्तपुरको बोडेमा लगिएको छ ।

सुकुम्वासीलाई भक्तपुर सारिएसँगै मन्त्रीहरूको पनि लर्को लागेको छ। मन्त्रीहरू भावुकता नबाँड्न आग्रह गर्दै सुकुम्वासी बस्तीमा पुगेका हुन् ।

बागमती किनारका बस्ती डुबानमा पर्ने भन्दै प्रधानमन्त्री वालेन्द्र शाह नेतृत्वको गत वैशाख १२ गतेदेखि जवर्जस्ती बल प्रयोग गरेर सुकुम्वासीलाई हटाएको थियो।

यसरी हटाइएका सुकुम्वासीलाई १५ दिनमा व्यवस्थापन गर्न सरकार असफल भएको थियो ।

यस्तोमा आइतबार गृहमन्त्री सुधन गुरुङ, स्वास्थ्यमन्त्री निशा मेहता, शिक्षामन्त्री सस्मित पोखरेल, श्रममन्त्री रामजी यादव, महिला मन्त्री सीता वादी र भूमि व्यवस्था, सहकारी तथा गरिबी निवारण मन्त्री प्रतिभा रावल लर्को लागेर सुकुम्वासी फकाउन पुगेका हुन् ।

त्यसक्रममा मन्त्री रावलले भूमिहीन सुकुम्वासीलाई कानुनी प्रक्रियाबाटै लालपूर्जा दिइने बताइन्। हतारमा लालपूर्जा दिँदा कानुनी समस्या आउन सक्ने बताउँदै उनले आगामी समयमा प्रश्न नउठ्ने गरी सरकारले काम गरिहेको जिकिर गरिन्।

सुकुम्वासीलाई फकाउँदै रावलले दीर्घकालीन समाधानमा केन्द्रित भएर सरकार सक्रिय रहेको बताइन् । उनले नतिजा दिने गरी सरकारले काम गरिरहेको बताउँदै चाँँडै लालपुर्जा दिने बताइन् ।