काठमाडौं– प्रधानमन्त्रीको प्रेस सल्लाहकारमा सूर्य थापा नियुक्त हुने भएका छन् ।

नेकपाका केन्द्रीय सदस्य तथा प्रचार विभाग उपप्रमुख रहेका थापालाई प्रधानमन्त्र केपी ओलीको प्रेस सल्लाहकारमा नियुक्त गर्ने तयारी भएको नेकपा निकट श्रोतको दाबी छ ।

आज साँझ बस्ने मन्त्रिपरिषद् बैठकले थापालाई नियुक्त गर्ने निर्णय गर्ने तयारी गरेको श्रोतको दाबी छ ।

यस अघि प्रधानमन्त्रीका प्रेस सल्लाहकार कुन्दन अर्याल थिए ।

प्रधानमन्त्री ओलीले सचिवालयमा रहेकालाई राजीनामा दिन भनेपछि अर्याल लगायतले राजीनामा दिएका थिए ।

प्रधानमन्त्री ओलीको सचिवालयबाट राजीनामा दिने ६ जनाको राजीनामा स्वीकृत भएको थियो ।

मंसिर १ गतेदेखि लागूहुने गरी राजीनामा दिएकामध्ये प्रधानमन्त्रीका प्रेस सल्लाहकार कुन्दन अर्याल, जनसम्पर्क सल्लाहकार अच्युत मैनाली, प्रेस संयोजक चेतन अधिकारी तथा सचिवालयमा कार्यरत घनश्याम भट्टराई, कृष्ण पौडेल र कम्प्युटर अपरेटर उदय पोखरेलको राजीनामा स्वीकृत भएको छ ।

प्रधानमन्त्रीको प्रमुख राजनीतिक सल्लाहकारमा भने विष्णु रिमाल र परराष्ट्र सल्लाहकार राजन भट्टराई यथावत रहने प्रधानमन्त्रीको सचिवालयले जनाएको छ।