काठमाडौं–  गणेश नेपालीको उपचारका क्रममा निधन भएपछि उनका आफन्तले आन्दोलनको तयारी गरेका छन् । 

त्रिपुरेश्वरस्थित राहदानी विभाग अगाडि आफ्नै शरीरमा आगो लगाएका मुगुको सोरु गाउँपालिका–१ का २५ वर्षीय नेपालीको उपचारका क्रममा निधन भएपछि उनका आफन्तले आन्दोलनको तयारी गरेका छन्।

 आफन्तले भने, ‘भने हामी शव बुझ्दैनौँ, रोड जाम गर्छौ, अगाडि बढ्छौँ’ ।

जलनबाट गम्भीर घाइते भएका नेपालीको वीर अस्पतालमा उपचार भइरहेको थियो। अस्पताल स्रोतका अनुसार भेन्टिलेटरमा उपचाररत उनको शुक्रबार बिहान ११ः२० बजे निधन भएको हो।

गणेशको मृत्यु भएपछि उनका आफन्तले सरकारले उनीमाथि अन्याय गरेको आरोप लगाउँदै शव बुझ्न अस्वीकार गरेका छन्। उनीहरूले घटनाको निष्पक्ष छानबिन, दोषीमाथि कारबाही र पीडित परिवारलाई न्यायको माग गर्दै आन्दोलनको तयारी गरिरहेका छन्।

अर्का आफन्त चन्द्रबहादुर शाहीका अनुसार गणेश नेपाली ३–४ वर्षअघि काठमाडौं आएका थिए। उनले किस्तामा मोटरसाइकल खरिद गरी राइड सेयरिङ सेवामा काम गर्दै आएका थिए।

बिहीबार निषेधित क्षेत्रमा मोटरसाइकल रोकेको भन्दै काठमाडौं महानगर प्रहरीले उनलाई रु १० हजार जरिवानाको चिट काटेको शाहीले बताए।

आफन्तले नगर प्रहरी नै घटनाको जिम्मेवार हुनुपर्ने उनको माग छ ।