काठमाडौं- प्रतिनिधिसभाले विभिन्न चार विधेयकमा राष्ट्रियसभाबाट भएका संशोधनलाई स्वीकृत गरेको छ।

बिहीबार बसेको प्रतिनिधिसभा बैठकले सार्वजनिक खरिद (दोस्रो संशोधन) विधेयक, २०८३, सम्पत्ति शुद्धीकरण (मनि लाउन्डरिङ) निवारण (तेस्रो संशोधन) विधेयक, २०८३, सहकारी (पहिलो संशोधन) विधेयक, २०८३ र स्वास्थ्य विज्ञान प्रतिष्ठानसम्बन्धी केही नेपाल ऐनलाई संशोधन गर्ने विधेयक, २०८३ मा राष्ट्रियसभाले गरेका संशोधनलाई स्वीकृत गरेको हो।

प्रधानमन्त्री वालेन्द्र शाहको तर्फबाट कानुन, न्याय तथा संसदीय मामिलामन्त्री सोविता गौतमले प्रस्तुत गरेको सार्वजनिक खरिद (दोस्रो संशोधन) विधेयकमाथिको राष्ट्रियसभाको संशोधन स्वीकृत गर्ने प्रस्ताव सर्वसम्मतिले पारित भएको थियो।

यस्तै, अर्थमन्त्री डा. स्वर्णिम वाग्लेले प्रस्तुत गरेको सम्पत्ति शुद्धीकरण (मनि लाउन्डरिङ) निवारण (तेस्रो संशोधन) विधेयकमा राष्ट्रियसभाबाट भएका संशोधन पनि सर्वसम्मतिले स्वीकृत भए।

भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले प्रस्तुत गरेको सहकारी (पहिलो संशोधन) विधेयकमाथिको राष्ट्रियसभाको संशोधन भने बहुमतबाट स्वीकृत भएको छ।

छलफलका क्रममा सांसद पार्वती विकले उठाएका प्रश्नको जवाफ दिँदै मन्त्री रावलले विधेयक कार्यान्वयनका क्रममा देखिएका समस्या समाधान गर्न व्यापक छलफलपछि संशोधन ल्याइएको बताइन्।

त्यसैगरी, स्वास्थ्य तथा खाद्य स्वच्छतामन्त्री निशा मेहताले प्रस्तुत गरेको स्वास्थ्य विज्ञान प्रतिष्ठानसम्बन्धी केही नेपाल ऐनलाई संशोधन गर्ने विधेयक, २०८३ माथिको राष्ट्रियसभाको संशोधन पनि सर्वसम्मतिले स्वीकृत भएको छ।

प्रतिनिधिसभाको अर्को बैठक असार २६ गते शुक्रबार दिउँसो १ बजे बस्नेछ।