काठमाडौं- रौतहटको मौलापुर नगरपालिकामा प्रमुख प्रशासकीय अधिकृत नपठाएको विरोधमा स्थानीयले प्रधानमन्त्री वालेन्द्र शाह (बालेन) को पुतला दहन गरेका छन्।

स्थानीय बासिन्दाले नगरपालिकालाई लामो समयदेखि प्रमुख प्रशासकीय अधिकृतविहीन बनाएर बजेट कार्यान्वयन र भुक्तानी प्रक्रिया अवरुद्ध भएको आरोप लगाउँदै विरोध प्रदर्शन गरेका हुन्। प्रदर्शनका क्रममा उनीहरूले प्रमुख प्रशासकीय अधिकृत तत्काल पठाउन, बजेट कार्यान्वयन गर्न तथा अदालतको आदेश कार्यान्वयन गर्न माग गर्दै नाराबाजी गरेका थिए।

स्थानीयका अनुसार संघीय मामिला तथा सामान्य प्रशासन मन्त्रालयले सरुवा गरी पठाएका प्रमुख प्रशासकीय अधिकृत सुरेशबाबु घिमिरेले जिम्मेवारी सम्हाल्न नसकेपछि मन्त्रालयले उनलाई फिर्ता बोलाएको थियो। त्यसपछि हालसम्म अर्को प्रमुख प्रशासकीय अधिकृत नपठाइएकाले नगरपालिकाको प्रशासनिक र वित्तीय काम प्रभावित भएको उनीहरूको भनाइ छ।

प्रमुख प्रशासकीय अधिकृतको अभावका कारण विकास निर्माणका योजना, बजेट कार्यान्वयन तथा विभिन्न शीर्षकका भुक्तानी रोकिएको भन्दै स्थानीय, सेवाग्राही तथा विभिन्न लाभग्राही समूहले यसअघि पनि आन्दोलन गर्दै आएका छन्।

छ महिनादेखि तलब नपाएको भन्दै नगर शिक्षकहरूले पेनडाउन आन्दोलन गरिरहेका छन्। बहुक्षेत्रीय पोषण कार्यक्रमका गर्भवती तथा सुत्केरी महिलाले समेत सम्बन्धित सुविधा पाउन नसकेको गुनासो गरेका छन्। सरसफाइ कर्मचारीले तलब नपाएपछि काम छाड्दा नगरको सरसफाइ व्यवस्था पनि प्रभावित भएको स्थानीयको भनाइ छ।

यसैबीच, सर्वोच्च अदालतले मौलापुर नगरपालिकाका निःशुल्क विद्युत्, निःशुल्क खानेपानीलगायत जनमुखी कार्यक्रमको भुक्तानी नरोक्न अन्तरिम आदेश दिएको भए पनि प्रमुख प्रशासकीय अधिकृत नहुँदा उक्त आदेश कार्यान्वयनमा समस्या भएको स्थानीयले बताएका छन्।

मौलापुर नगरपालिकाकी प्रमुख रिना साहले पनि प्रमुख प्रशासकीय अधिकृत नपठाएर संघीय सरकारले नगरपालिकालाई प्रशासनिक संकटमा धकेलेको आरोप लगाएकी छन्। बजेट कार्यान्वयन र भुक्तानीका लागि अत्यन्त महत्वपूर्ण समयमा कर्मचारी रिक्त राखिएकाले बजेट फ्रिज हुने अवस्था सिर्जना भएको उनको दाबी छ।

यस विषयमा प्रधानमन्त्री तथा संघीय मामिला तथा सामान्य प्रशासन मन्त्रालयको आधिकारिक प्रतिक्रिया भने सार्वजनिक भएको छैन।