काठमाडौँ – पूर्वसचिव एवं पूर्वअर्थमन्त्री रामेश्वर खनालले शक्तिशाली सार्वजनिक पदमा बस्नेले निजी र सार्वजनिक जीवन छुट्याउन नसक्दा भ्रष्टाचार र कुशासनको संस्थागत सुरुवात हुने टिप्पणी गरेका छन् । सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले नेपालको शासकीय संयन्त्रभित्र भइरहेको बिचौलियाको सेटिङ र प्रभावलाई उजागर गरेका हुन् ।

खनालले शक्तिमा रहेका अधिकारीका परिवार र निवासलाई माध्यम बनाएर बिचौलियाहरू कसरी निर्णय प्रक्रियामा हाबी हुन्छन् भन्ने कुरा सिलसिलेवार रूपमा उल्लेख गरेका छन् । उनको फेसबुकमा लेखेका छन्, “शक्तिशाली सार्वजनिक पदमा बहाल अधिकारीले निजी जीवन र सार्वजनिक जीवन छट्याउन सकेनन् भने- भ्रष्टाचार र कुशासनको प्रारम्भ ठ्याक्क त्यही विन्दुबाट हुन्छ।”

निवासमा भेट्न आउने व्यक्तिले पहिला पत्नी वा पतिको भरपूर तरिफ गर्छ। “म्याडम,” “साहेबनी,” “मन्त्राणीज्यू,” “श्रीमान” वा “हजुर” — मौका र व्यक्ति हेरी सम्बोधन गर्दै गुणगान गाउँछ। घरमा केटाकेटी भए सुरुमा चकलेट र बिस्तारै महँगा उपहार ल्याउन थाल्छ। पाल्तु जनावर भए, ट्रीट लिएर आउँछ र त्यो पप्पीको समेत प्रिय बन्छ।

घरका सबैको प्रिय भइसकेपछि, आफ्नो वञ्छित/अवाञ्छित चाहना ती शक्तिसम्पन्न अधिकारीबाट पूरा गराउन उसलाई कुनै गाह्रो पर्दैन। र उसले आफ्नो प्रभावक्षेत्र यसरी विस्तार गर्दै लैजान्छ कि सम्बन्धित निकायका तल्ला निर्णायक अधिकारीहरूलाई समेत, मानौँ ऊ स्वयं नै मुख्य अधिकारी हो जस्तो गरी खटनपटन गर्न थाल्छ।

उनले जेनजी विद्रोहअघिको हाम्रो शासकीय संयन्त्रमा रहेको रोग ठ्याक्कै यही भएको बताएका छन्।