काठमाडौं- कर्णाली राजमार्ग अन्तर्गत साङ्गेतडास्थित कर्णाली नदीमा यात्रुवाहक माइक्रो बस खस्दा भएको दुर्घटनाप्रति नेपाली कम्युनिष्ट पार्टी नेकपाले गहिरो दुःख व्यक्त गरेको छ । सुर्खेतबाट कालीकोटतर्फ जाँदै गरेको माइक्रो बस नदीमा खस्दा ठूलो जनधनको क्षति भएको यस घटनाले आफूलाई अत्यन्त मर्माहत र दुखित बनाएको पार्टीका संयोजक पुष्पकमल दाहाल ‘प्रचण्ड’ ले जनाएका छन् ।

संयोजक प्रचण्डले यस दुःखद र हृदयविदारक दुर्घटनामा परी ज्यान गुमाएका मृतकहरूप्रति भावपूर्ण श्रद्धाञ्जली अर्पण गर्दै शोक सन्तप्त परिवारजनमा गहिरो समवेदना प्रकट गरेका छन् । विपद्को यो कठिन घडीमा पीडित परिवारलाई धैर्यधारण गर्ने शक्ति मिलोस् भन्दै उनले दुर्घटनामा परेका नागरिकहरूको अवस्थाप्रति चिन्ता व्यक्त गरेका छन् ।

उनले दुर्घटना लगत्तै नदीमा बेपत्ता भएका यात्रुहरूको तीव्र खोजी गर्न, घाइतेहरूको तत्काल उद्धार गर्न र उनीहरूको प्रभावकारी एवं निःशुल्क उपचारको व्यवस्था मिलाउन सम्बन्धित सरकारी निकाय र स्थानीय प्रशासनसँग जोडदार आग्रह गरेका छन् । साथै, उनले विपद्को यस दुःखद समयमा उद्धार र राहत कार्यमा आवश्यक समन्वय गर्दै स्थानीय प्रशासनलाई सम्पूर्ण रूपमा सहयोग गर्न आफ्नो पार्टी पङ्क्तिलाई समेत निर्देशित गरेका छन् ।