भियना – युरोपभर प्रभाव पारेको पछिल्लो गर्मीको लहर अस्ट्रियामा जुन महिनाको अहिलेसम्मकै लामो गर्मीको लहर बनेको राष्ट्रिय मौसम एजेन्सीले जनाएको छ ।

अस्ट्रियाको मौसम एजेन्सी जियोस्फेयर अस्ट्रियाका अनुसार जुन महिनामा देशको औसत तापक्रम सामान्यभन्दा एका दशमलव चार डिग्री सेल्सियस बढी रहेको थियो ।

जियोस्फेयर अस्ट्रियाका मौसमविद् अलेक्जेन्डर ओर्लिकले नयाँ तापक्रम रेकर्ड अघिल्ला रेकर्डभन्दा सामान्य अन्तरले मात्र नभई उल्लेखनीय रूपमा फरक रहेको बताएका छन् ।

मौसम एजेन्सीका अनुसार क्षेत्रअनुसार १० देखि १४ दिनसम्म ८०० मिटरभन्दा कम उचाइ भएका स्थानमा तापक्रम ३० डिग्री सेल्सियसभन्दा माथि पुगेको थियो। जुन महिनामा यसअघि राष्ट्रव्यापी रूपमा यस्तो अवस्था कहिल्यै नदेखिएको ओर्लिकले बताए ।

अस्ट्रियाका ६६ मौसम केन्द्रमा वार्षिक तापक्रम रेकर्ड कायम भएको जनाइएको छ। उच्च पहाडी क्षेत्रमा जुन महिनाको दोस्रो भागमा तापक्रम सन् १९९१–२०२० को औसतभन्दा करिब पाँच डिग्री सेल्सियस र सन् १९६१–१९९० को औसतभन्दा करिब सात डिग्री सेल्सियस बढी रहेको मौसमविद्हरूले बताएका छन्। जुन महिनाको अन्त्यबाट युरोपमा देखिएको गर्मीको लहर जलवायु परिवर्तनबिना सम्भव हुन निकै कठिन रहेको वैज्ञानिकको विश्व मौसम विशेषता समूहले जनाएको छ।

जर्मनी, पोल्यान्ड, चेक गणतन्त्र, स्लोभाकिया, हङ्गेरी, बेलायत र स्विजरल्याण्डमा पनि जुन महिनाका लागि हालसम्मकै उच्च तापक्रमको रेकर्ड कायम भएको जनाइएको छ। फ्रान्सले उच्च औसत तापक्रम र अहिलेसम्मकै सबैभन्दा तातो रातको सामना गरेको थियो।