कैलाली- कैलालीमा विद्यालयबाट हराएकी ६ वर्षीया बालिका मृत अवस्थामा फेला परेकी छन्।

लम्कीचुहा नगरपालिका–४ की मनिषा विक बुधबार रोरा खोला किनारमा मृत अवस्थामा फेला परेकी जिल्ला प्रहरी कार्यालय कैलालीले जनाएको छ।

जनचेतना प्राथमिक विद्यालयमा नर्सरी कक्षामा अध्ययनरत मनिषालाई मंगलबार बिहान करिब ७ बजे उनकी हजुरआमाले विद्यालय पुर्‍याएकी थिइन्। विद्यालयको नियमित बिदा समय बिहान ११ बजे भए पनि मंगलबार विशेष कारणवश ९ बजे नै बिदा गरिएको थियो।

हजुरआमा नियमित समयअनुसार ११ बजे विद्यालय लिन पुग्दा मनिषा त्यहाँ नभेटिएपछि परिवारले खोजी सुरु गरेको थियो। बालिका सम्पर्कविहीन भएपछि प्रहरी र स्थानीयवासीको सहयोगमा खोजी अभियान सञ्चालन गरिएको थियो।

जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) योगेन्द्र तिमिल्सिनाका अनुसार बुधबार लम्कीचुहा नगरपालिका–५ चौरीस्थित रोरा खोला किनारमा मनिषाको शव फेला परेको हो।

घटनाको कारण खुल्न बाँकी रहेको र यस सम्बन्धमा थप अनुसन्धान भइरहेको प्रहरीले जनाएको छ।