काठमाडौं-  युवा, श्रम तथा रोजगारमन्त्री रामजी यादवसँग नेपालका लागि साउदी अरबका राजदूत फहद मोहम्मद ए. मिएखरले शिष्टाचार भेट गरेका छन्।

भेटका क्रममा मन्त्री यादवले साउदी अरबले कार्यान्वयन गर्न लागेको नेपाली श्रमिकको सीप प्रमाणीकरण (एसभिपी) प्रक्रिया तत्काल स्थगित गर्न आग्रह गरेका छन्। उनले उक्त प्रक्रियाका कारण नेपाली श्रमिकको भिसा प्रक्रिया प्रभावित नहोस् र भिसा जारी गर्ने कार्य यथावत् सञ्चालन गरियोस् भन्ने विषयमा पनि विशेष अनुरोध गरेका हुन्।

हाल साउदी अरब जान तयारी अवस्थामा रहेका नेपाली श्रमिकहरू सीप प्रमाणीकरण प्रक्रियासम्बन्धी अन्योलका कारण समस्यामा परेको उल्लेख गर्दै मन्त्री यादवले उनीहरूको रोजगारीमा कुनै अवरोध नआउने वातावरण सुनिश्चित गर्न साउदी पक्षसँग आग्रह गरे।

उनले सीप प्रमाणीकरण (एसभिपी) सम्बन्धी सबै विषय द्विपक्षीय परामर्श र आपसी सहमतिका आधारमा स्थापित संयन्त्रमार्फत समाधान गर्नुपर्नेमा जोड दिए।

भेटका क्रममा राजदूत मिएखरले यस विषयमा साउदी सरकारसँग आवश्यक परामर्श गरी थप जानकारी उपलब्ध गराइने विश्वास दिलाएको श्रममन्त्री यादवको सचिवालयले जनाएको छ।