चितवन – राष्ट्रिय स्वतन्त्र पार्टी (रास्वपा) को पहिलो महाधिवेशन चितवनमा जारी रहेका बेला प्रतिनिधिसभा सदस्य रिमा विश्वकर्माले सहमहामन्त्री पदमा उम्मेदवारी दिने घोषणा गरेकी छन्।

महाधिवेशनस्थलमा सञ्चारकर्मीसँग कुरा गर्दै विश्वकर्माले पार्टीलाई संस्थागत, समावेशी र जनमुखी बनाउन आफूले सहमहामन्त्री पदमा उम्मेदवारी दिन लागेको बताइन् ।

उनले रास्वपाले वैकल्पिक राजनीतिक शक्तिको रूपमा स्थापित हुने क्रममा संगठनलाई अझ बलियो बनाउनुपर्ने आवश्यकता रहेको उल्लेख गर्दै त्यसका लागि आफ्नो अनुभव र क्षमताको उपयोग गर्ने प्रतिबद्धता व्यक्त गरिन् ।

विश्वकर्माले पार्टीभित्र महिला, युवा तथा सीमान्तकृत समुदायको सहभागिता र नेतृत्व विकासलाई प्राथमिकतामा राखेर काम गर्ने बताइन् । रास्वपाले उठाएका सुशासन, पारदर्शिता र जवाफदेहिताका एजेन्डालाई संगठनको तल्लो तहसम्म प्रभावकारी रूपमा कार्यान्वयन गर्न आफूले भूमिका खेल्ने उनको भनाइ छ ।