काठमाडौं- राष्ट्रिय स्वतन्त्र पार्टी (रास्वपा) को पहिलो महाधिवेशनअन्तर्गत केन्द्रीय सदस्य पदको निर्वाचन सम्पन्न भएको छ। अब दोस्रो चरणमा पदाधिकारी चयनका लागि निर्वाचन हुने तयारी भइरहेको छ।

पार्टीको ५०० सदस्यीय केन्द्रीय समितिका लागि ३८४ जनाले उम्मेदवारी दिएका छन्। केन्द्रीय सदस्यको नतिजापछि मात्रै पदाधिकारी निर्वाचन प्रक्रिया अघि बढ्ने भएकाले पदाधिकारी बन्न चाहने आकांक्षीहरूले सर्वप्रथम केन्द्रीय सदस्यमा निर्वाचित हुनुपर्ने व्यवस्था छ।

पार्टी नेताहरूका अनुसार छ पदाधिकारी पदका लागि ३० जनाभन्दा बढी नेताहरूले इच्छा व्यक्त गरेका छन्। पदाधिकारी निर्वाचनमा पराजित भएका केही आकांक्षीलाई पनि आवश्यकताअनुसार सचिवालय सदस्यमा सभापति रवि लामिछानेले मनोनयन गर्न सक्ने सम्भावना रहेको नेताहरूको भनाइ छ।

रास्वपाका नेता विराजभक्त श्रेष्ठले देशको प्रमुख राजनीतिक शक्तिका रूपमा स्थापित हुँदै गएको पार्टीमा पदाधिकारी बन्ने आकांक्षा स्वाभाविक रहेको बताए। उनले सहमतिको प्रयास हुन सक्ने भए पनि त्यसका नाममा कसैलाई अन्याय नगर्ने स्पष्ट पारे।

‘सहमतिको प्रयास हुन सक्छ, तर सहमतिकै नाममा निर्वाचनमा उठ्न चाहने साथीहरूलाई अन्याय हुँदैन,’ श्रेष्ठले भने, ‘पहिलो महाधिवेशन भएकाले हामीले धेरै कुरा सिक्नुपर्ने निष्कर्षमा पुगेका छौं।’

उनले धेरै नेताहरूले पदाधिकारी बन्ने इच्छा राख्नु पार्टीको विस्तार र आकर्षणको संकेत भएको पनि बताए।

‘धेरै साथीहरूले आकांक्षा राख्नु गलत कुरा होइन। बरु ठूलो पार्टीमा थोरै नेताहरूले मात्रै आकांक्षा राख्दा पो शंका गर्ने ठाउँ हुन्छ,’ उनले भने।

रास्वपाले स्थापना भएको चार वर्षपछि पहिलोपटक महाधिवेशन आयोजना गरेको हो। विभिन्न पृष्ठभूमि र समूहबाट आएका नेताहरूलाई समेट्ने उद्देश्यसहित पार्टीले १९ पदाधिकारीमध्ये ६ पदमा मात्रै निर्वाचन गर्ने र बाँकी पदाधिकारी सभापतिले चयन गर्ने व्यवस्था गरेको छ। यस व्यवस्थाले नेतृत्व चयनमा प्रतिस्पर्धा र समावेशिताबीच सन्तुलन कायम गर्ने पार्टीको अपेक्षा रहेको छ।