चितवन – सूचना तथा सञ्चारमन्त्री तथा राष्ट्रिय स्वतन्त्र पार्टी (रास्वपा)का नेता डा. विक्रम तिमिल्सिनाले पार्टीको पहिलो महाधिवेशनले रास्वपालाई थप सुदृढ, जिम्मेवार र एकीकृत बनाउने विश्वास व्यक्त गरेका छन्।

महाधिवेशनअन्तर्गत मतदान प्रक्रियामा सहभागी भएपछि सञ्चारकर्मीसँग प्रतिक्रिया दिँदै उहाँले महाधिवेशनपछि पार्टी अझ व्यवस्थित, जिम्मेवार र सशक्त ढङ्गले अघि बढ्ने बताए।

डा. तिमिल्सिनाले रास्वपाभित्र गुट–उपगुटको राजनीति नभएको उल्लेख गर्दै महाधिवेशनबाट आउने निर्णयलाई सबैले आत्मसात गरी पार्टीलाई थप मजबुत बनाउने जिम्मेवारी रहेको बताए।

‘रास्वपाभित्र गुट–उपगुट नभएकाले एकीकृत भएर अघि बढ्नुको विकल्प छैन। महाधिवेशन प्रतिनिधिले दिएको निर्णयलाई आत्मसात गर्दै पार्टीलाई अझ राम्रो बनाउने हाम्रो दायित्व हो,’ उनले भने, ‘पार्टी थप बलियो, एकीकृत र अझ जिम्मेवार भएर अगाडि बढ्छ भन्नेमा कुनै शङ्का छैन।’

उनले राजनीतिक दलको जीवनमा महाधिवेशनको विशेष महत्व रहने उल्लेख गर्दै यसले संगठनलाई लोकतान्त्रिक अभ्यासमार्फत थप सुदृढ बनाउने धारणा राखे।

‘देशका विभिन्न क्षेत्रबाट आएका प्रतिनिधिहरूले रास्वपाको भावना, उद्देश्य र भविष्यलाई केन्द्रमा राखेर विवेकपूर्ण ढङ्गले मतदान गरिरहेका छन् । यही नै पार्टी जीवनको लोकतान्त्रिक अभ्यास हो,’ उनले भने।

डा. तिमिल्सिनाले महाधिवेशनबाट चयन हुने नेतृत्वले मुलुकको सबैभन्दा ठूलो राजनीतिक दलका रूपमा रहेको रास्वपालाई आमनागरिकको अपेक्षाअनुसार अघि बढाउने विश्वास समेत व्यक्त गरे। उनका अनुसार नयाँ नेतृत्वले पार्टीलाई अझ प्रभावकारी, उत्तरदायी र जनमुखी बनाउँदै राष्ट्रिय राजनीतिमा थप सशक्त भूमिका निर्वाह गर्नेछ।