काठमाडौं– नेपाल कम्युनिस्ट पार्टी (नेकपा)का अध्यक्ष केपी शर्मा ओली नेतृत्वको सरकारले एक वर्षमै आर्थिक सहायताका नाममा राज्यको ढुकुटीबाट पौने २ अर्ब रुपैयाँभन्दा बढी खर्च गरेको नागरिक दैनिकमा खबर छ ।

२०७४ फागुन ३ गते सरकारको नेतृत्वमा आएपछि ओलीले विकास, सुशासन र आर्थिक मितव्ययितालाई मूलमन्त्रको रुपमा प्रचार गरेका थिए । ओली सरकारले एक वर्षको अवधिमा आर्थिक सहायता र सहित घोषणाको नाममा १ अर्ब ८० करोड ९३ लाख रुपैयाँभन्दा बढी राज्यको ढुकुटीबाट बाँडेको हो ।त्यस्तै विदेश भ्रमणमा २३ करोड रुपैयाँ खर्च भएको छ ।

त्यस्तै अधिकारीको अन्त्येष्टि शीर्षकको समाचारमा पूर्वउपप्रधानमन्त्री भरतमोहन अधिकारीको आइतबार पशुपति आर्यघाटमा अन्त्येष्टि गरिएको छ । पुराना कम्युनिस्ट नेता अधिकारीको राष्ट्रिय सम्मानका साथ अन्त्येष्टि गरिएको हो । लामो समयदेखि मुटु, फोक्सोसहित रोगहरुबाट पीडित अधिकारीको पार्थिव शरीरमा तीन छोरीहरु लिमा, लुना र लिजाले दागबत्ती दिएका थिए ।

३१ थरीका गुराँस ढकमक्क शीर्षकको समाचारमा प्रदेश नम्बर १ का पहाडी जिल्लामा ३१ प्रजातिका गुराँस पाइएका छन् । पाँचजना विज्ञले अनुसन्धान गर्दा यो तथ्य पत्ता लागेको हो । देख्दा आकर्षक र औषधीय महत्व राख्ने गुराँसको चर्चा साहित्यमा पनि विभिन्न बिम्बका रुपमा प्रयोग गर्ने गरिएको छ ।

महाशिवरात्रिको तयारी शीर्षकको सम्पादकीयमा महाशिवरात्रि मनाउन जुन किसिमको तयारी गर्नुपर्ने हो, त्यसतर्फ पशुपति क्षेत्र विकास कोषको ध्यान नपुगेको देखिएको छ । सडकमा ढुंगा छाप्नेदेखि कतिपय संरचना निर्माणको काम अलपत्र छाडिएको छ। साधुसन्त बस्न व्यवस्था गरिएको दक्षिणपट्टिको स्थानको फोहोर सफाइमा ध्यान दिएको देखिँदैन । भक्तजन हिँड्ने भित्रि सडकका खाल्डाखुल्डी पनि त्यत्तिकै छाडिएका छन् ।