काठमाडौं – राष्ट्रिय स्वतन्त्र पार्टी (रास्वपा)को पहिलो महाधिवेशनमा प्रतिनिधि छनोटलाई लिएर असन्तुष्टि चुलिएको छ। सभापति पदमा उम्मेदवारी दिने घोषणा गरेपछि आफ्नो नाम प्रतिनिधि सूचीबाट हटाइएको आरोप एक प्रतिनिधिले लगाएका छन्।

बाराको क्षेत्र नम्बर ३ का प्रतिनिधि भोला कुमार साह (कानु) ले सामाजिक सञ्जालमा सभापतिमा उम्मेदवारी दिने घोषणा गरेपछि आफूलाई महाधिवेशन प्रतिनिधिको सूचीबाट हटाइएको गुनासो गरेका छन्। उनका अनुसार यसअघि मधेश प्रदेशबाट उनको नाम प्रतिनिधि सूचीको १०२ नम्बरमा समावेश गरिएको थियो।

तर सभापतिमा उठ्ने इच्छा सार्वजनिक गरेपछि नाम हटाइएको दाबी गर्दै उनले असन्तुष्टि व्यक्त गरेका छन्। अन्तिम नामावलीमा आफ्नो नाम समावेश नभएको भन्दै उनले आपत्ति जनाएका छन्।

महाधिवेशन प्रतिनिधि छनोट प्रक्रियालाई लिएर विभिन्न स्थानमा विवाद देखिन थालेको छ। पार्टी नेतृत्वले भने यस विषयमा औपचारिक प्रतिक्रिया सार्वजनिक गरेको छैन।