काठमाडौँ– नेपाली कांग्रेसका पुराना नेता एवं पूर्वमन्त्री राजेन्द्र खरेलको निधन भएको छ । ८० वर्षीय खरेलको गएराति बानेश्वरस्थित फ्रन्टलाइन अस्पतालमा निधन भएको हो । दमलगायत स्वास्थ्य समस्या देखिएपछि केही दिनअघि उनलाई अस्पताल भर्ना गरिएको थियो ।

२००३ सालमा काभ्रेको खरेलथोकमा जन्मिएका राजेन्द्र नेपाली कांग्रेसका आदर्शवादी नेताका रुपमा परिचित थिए । खरेल २०२५–०२६ सालतिर तत्कालीन नेशनल कलेज (हालको शंकरदेव कलेज)मा नेपाल विद्यार्थी संघको इकाइ कमिटीका सचिव भएर राजनीतिमा क्रियाशील भएका थिए।

२०३६ सालको जनमत संग्रह, २०४२ को सत्याग्रह, २०४६ को जनआन्दोलन र २०६२–०६३ को जनआन्दोलनमा उनले सक्रिय भूमिका निभाएका थिए । राजनीतिमा सक्रिय भएवापत उनले पटकपटक गरी झण्डै ९ वर्ष जेल जीवन बिताएका थिए ।

खरेल २०५६ सालमा संसद जितेपछि शिक्षा राज्यमन्त्री हुँदै महिला बालबालिका तथा समाज कल्याण मन्त्री भएका थिए।

खरेलको पार्थिव शरीर आज बिहान ९ बजेदेखि ११ बजेसम्म कांग्रेसको केन्द्रीय कार्यालय सानेपामा श्रद्धाञ्जलीका लागि राखिने बताइएको छ। उनको आजै पशुपति आर्यघाटमा अन्तिम संस्कार गरिनेछ ।