काठमाडौं– अर्थमन्त्री डा. स्वर्णिम वाग्लेले प्रतिपक्षतर्फ इसारा गर्दै आफूमाथि करको दरमा हेरफेरको प्रश्न उठाउनेको काण्ड छानबिन गर्ने बताएका छन् । बिहीबार प्रतिनिधिसभामा बजेटमाथि उठेका प्रश्नको जवाफ दिँदै डा वाग्लेले आफूलाई पनि काण्डहरूको बारेमा थाहा भएको र ती काण्ड खुल्ने बताएका हुन् ।

उनले आफूमाथि केही खोस्टाहरूले लेखेको तर, आफूले दुई रुपैयाँ पनि बदमासी गरेको भए मन्त्री पद र सार्वजनिक जीवन नै त्याग गरिने बताए ।

‘आज मैले सार्वजनिक लेखा समितिमा पनि भने एक दुईटा खोस्टाहरूले लेखे, कि दुई अर्बको आशंका इत्यादी भनेर, दुई अर्ब होइन दुई रुपैयाँ बदमासी बेइमानी म बाट भएको छ भने म मन्त्री पद त्यागिदिन्छु, सार्वजनिक जीवन नै त्याग्न पनि म तयार छु, दुई रुपैयाँ र यो नैतिक आँट, नैतिक उचाइ म प्रति औँलो ठड्याउने माननीयज्यूहरूलाई पनि प्राप्त होस्, शुभकामना छ’, उनले भने ।

सो भनाइमा रास्वपाका सांसदहरूको गडगडाहट तालीपछि डा वाग्लेले फेरि प्रतिपक्षीतर्फ संकेत गर्दै विपक्षीको काण्ड खुल्ने चेतावनी दिए ।

‘तपाईंहरूका काण्डबारे हामी अनविज्ञ हो र ? ति पनि खुल्नेछन्’, उनले भने ।