गौर– विस्फोटक पदार्थ (बम) समेत प्रयोग गरी ज्यान मार्ने उद्योग र कर्तव्य ज्यानको कसुर गरेको आरोप लागेका कांग्रेस नेता मोहम्म अफताव आलममाथिको थुनछेक बहस अझै लम्बिने भएको छ ।

गत बुधबारदेखि शुरु भएको थुनछेक बहसको छैटौं दिन आलमका पक्षबाट ३ जना कानून व्यवसायीले बहस गरे ।

आलमको पक्षबाट बहस गर्न भनेर २८ जना कानून व्यवसायीहरुले वकालतनामा दर्ता गराएका छन् ।

आलमको तर्फबाट सोमबार र मंगलबार गरी ७ जना कानून व्यवसायीहरुले बहस गरिसकेका छन् ।

जिल्ला अदालत रौतहटका श्रेस्तेदार गुणराज पराजुलीले मंगलबार पनि बहस नसकिएका कारण बुधबार १० बजे उपस्थित गराउने गरी आलमलाई प्रहरी हिरासतमा फिर्ता पठाइएको बताए ।

वकालतनामा लेखाएका सबै कानून व्यवसायीले बहस गर्ने समय लिए बिहीबारसम्म बहस लम्बिने अदालत स्रोतले जानकारी दियो । वकालतनामा दर्ता गराएकामध्ये अझै पनि करिब २१ जना कानून व्यवसायीहरुले बहस गर्न बाँकी छ ।

आलमको पक्षका वकिलहरुले बहस गरिसकेपछि सरकारी वकिलको तर्फबाट पनि प्रतिबहस हुने छ ।

आलममाथि २७ जेठ २०६४ मा विस्फोटक पदार्थको प्रयोग गरी कर्तव्य ज्यान र ज्यान मार्ने उद्योगको कसुर गरेको अभियोग लागेको छ ।

जिल्ला सरकारी वकिलको कार्यालय रौतहटले गत सोमबार आलमसहित ११ जनाविरुद्ध जिल्ला अदालतमा अभियोग पत्र दायर गरेको थियो । अभियोग पत्रमा आलमसहित १० जनाविरुद्ध आजीवन काराबासको सजाय मागदाबी गरिएको छ भने अर्का एकलाई घटनाको मतियारका रुपमा प्रस्तुत गरी सोहीअनुसारको सजायको मागदाबी गरिएको छ ।