काठमाडौं । प्रतिनिधि सभाको बैठकमा सभामुख डोलप्रसाद अर्यालले बोल्ने समय नदिएको भन्दै श्रम संस्कृति पार्टीका सांसदहरूले तीव्र विरोध र नाराबाजी गरेका छन् । बैठकमा आफ्नो पार्टीलाई विभेद गरिएको आरोप लगाउँदै श्रम संस्कृति पार्टीका अध्यक्ष हर्क साम्पाङ सदनभित्रै उठेर विरोधमा उत्रिएका हुन् । अध्यक्ष साम्पाङले संसदभित्र आफूहरूमाथि गम्भीर विभेद भएको भन्दै सभामुखको भूमिकामाथि प्रश्न उठाएका छन् ।

श्रम संस्कृति पार्टीका सांसदहरूले विरोध गरेपछि सभामुख अर्यालले बोल्नेहरूको सूचीमा नाम समावेश नभएका कारण आफूले नबोलाएको भन्दै सदनमा स्पष्टीकरण दिएका थिए । तर सभामुखको स्पष्टीकरणप्रति असन्तुष्टि जनाउँदै अध्यक्ष साम्पाङले आफ्नो पार्टीमाथि अपमान र विभेद जारी रहेको दाबी गर्दै प्रतिनिधि सभाको बैठकमा अवरोध सिर्जना गरिरहेका छन् ।

सभामुख अर्यालले आफ्नो कुरा सुन्ने धैर्यता नराखेको भन्दै राईको व्यवहारप्रति आपत्ति समेत जनाए । संसद्‌मा तनाव बढेसँगै श्रम संस्कृति पार्टीका सांसदहरूले ‘निरङ्कुशतन्त्र बन्द गर’, ‘विभेद गर्न पाइँदैन’ र ‘बोल्ने अधिकार दे’ जस्ता नाराहरू लगाउँदै प्रतिनिधि सभाको बैठकमा लगातार विरोध प्रदर्शन गरिरहेका छन् ।