सिराहा – राष्ट्रिय स्वतन्त्र पार्टी (रास्वपा)को सिरहा जिल्ला अधिवेशनमा नेतृत्व चयनको विषयलाई लिएर दुई समूहबीच कुटाकुट भएको छ। झडपमा र्‍यापिड एक्सन टिमका जिल्ला प्रमुख दिनेश थापासहित केही व्यक्ति घाइते भएका छन् ।

जिरोमाइलस्थित अधिवेशन स्थलमा सोमबार दिउँसो सभापति चयन प्रक्रियाबारे उत्पन्न विवादले उग्र रूप लिएपछि स्थिति नियन्त्रणबाहिर पुगेको हो। घटनाका क्रममा र्‍यापिड एक्सन टिमका सदस्यको सर्ट च्यातिएको र औँला समेत भाँचिएको जनाइएको छ।

अधिवेशनमा सभापतिका लागि सुभाष यादव, रामसोगारथ यादव र वर्तमान सभापति हरि मैनाली आकांक्षी रहेका थिए। रामसोगारथ यादव सर्वसम्मत नेतृत्व चयन हुनुपर्ने पक्षमा देखिएका थिए भने सुभाष यादव र हरि मैनालीले निर्वाचनमार्फत नेतृत्व चयन हुनुपर्ने अडान लिएका थिए । यही मतभेदले दुई समूहबीच तनाव चुलिएको हो ।

घटनापछि स्थिति असहज बनेपछि पार्टीको केन्द्रीय निर्वाचन आयोगले मंगलबार बिहान ९ बजेसम्मका लागि निर्वाचन प्रक्रिया स्थगित गरेको छ।

आयोगका प्रमुख भुवन केसी ले जारी गरेको विज्ञप्तिमा सिराहा जिल्लाको अधिवेशनमा देखिएको तनाव र सुरक्षा अवस्थालाई ध्यानमा राख्दै तत्कालका लागि निर्वाचन प्रक्रिया रोकिएको उल्लेख गरिएको छ।

विज्ञप्तिअनुसार जिल्ला सभापति हरि मैनाली र अन्य नेताहरूसँग भिडियो संवादपछि परिस्थिति केही सहज भएको जनाइएको छ। सहमति र समझदारीपछि स्थगित गरिएको निर्वाचन प्रक्रिया भोलि बिहान ९ बजेदेखि पुनः सञ्चालन गर्ने निर्णय गरिएको छ।

निर्वाचन आयोगले सबै पक्षलाई शान्त, मर्यादित र सौहार्दपूर्ण वातावरणमा प्रक्रिया सम्पन्न गर्न आग्रह गरेको छ।