काठमाडौं– प्रतिनिधिसभाका सांसदहरुले आफूहरुको अवस्था दयनीय रहेको गुनासो पोखेका छन् ।

नेपाल र अमेरिकाको संसदीय अभ्यासबारे आयोजित अन्तरक्रियामा नेपालका सांसदहरुले आफूहरुले आर्थिक संकट व्यहोर्नु परेको बताउँदै ट्याक्सी चढ्ने पैसा पनि नहुने गरेको बताए ।

सांसद माया ज्ञवालीले नेपालका सांसदसँग ट्याक्सी चढ्ने पैसा पनि नहुने बताएकी हुन् । सांसदलाई साधन स्रोत केही नभएको उनको गुनासो थियो । उनले आफूले रोजेको संसदीय समिति पनि नपाएको गुनासो गरिन् ।

सांसद लक्ष्मी परियारले नेपालमा प्रत्यक्ष निर्वा्चित सांसदलाई बढी प्राथमिकता दिने गरिएको तर समानुपातिक सांसदलाई विभेद गरिएको बताइन् ।

सांसद मानबहादुर विश्वकर्माले प्रधानमन्त्री र मन्त्रीहरुले बोलेको कुरा पूरा नगर्ने र विपक्षीको सरोकारलाई सुनुवाई पनि नगरेको गुनासो राखे ।

नेपालका सांसदहरुले राखेको जिज्ञासाको जवाफ अमेरिकी पूर्वसांसद बब गुडलाडे र अमेरिकी संसदको सल्लाहकारमा ३६ वर्ष काम गरेका ब्राड स्मिथले जवाफ दिएका थिए ।

उनीहरुले अमेरिकाको संदमा ७ सय जना भन्दा बढीको अनुसन्धान टोली रहेको र एक जना सांसदको टिममा १८ जनासम्म अनुसन्धानकर्ता रहने बताएका थिए ।