काठमाडौं– औषधि व्यवस्था विभागले क्यान्सर उपचारमा प्रयोग हुने प्लाटिनम समूहका औषधि तथा सलाइन औषधिको आयात, खपत र आपूर्ति अवस्थाबारे विस्तृत विवरण बुझाउन सम्बन्धित पैठारीकर्तालाई पुनः ताकेता गरेको छ।

विभागले एक सूचना जारी गर्दै औषधिको उत्पादन मुलुक, मूल्य विवरण, पछिल्ला तीन आर्थिक वर्षको खपत विवरण तथा आगामी आर्थिक वर्षको प्रक्षेपण योजना तत्काल पेश गर्न निर्देशन दिएको हो । 

सम्बन्धित पैठारीकर्तालाई यसअघि पत्राचार गरी तीन दिनभित्र विवरण बुझाउन भनेको भए पनि केही कम्पनीबाट विवरण प्राप्त नभएकाले पुनः सूचना जारी गरिएको विभागले जनाएको छ।

त्यस्तै, दर्ता भएर पनि आयात नभएका औषधिको हकमा कारणसहितको विवरण दुई दिनभित्र विभागमा पेश गर्न सम्बन्धित पैठारीकर्तालाई आग्रह गरिएको छ । विभागले क्यान्सर उपचारमा आवश्यक औषधिको आपूर्ति तथा व्यवस्थापनलाई प्रभावकारी बनाउन उक्त विवरण संकलन गर्न लागेको जनाएको छ ।