दोलखा– दोलखाको गौरीशङ्कर गाउँपालिका–७, कोप्लाङ स्थित ग्रिन लाइफ हाइड्रोपावरमा कार्यरत एक युवकको भीरबाट खसेर मृत्यु भएको छ।

मृत्यु हुनेमा रोल्पाका २७ वर्षीय निमराज के.सी. रहेका छन् । उनी आयोजनास्थल नजिकैको भीरबाट खसेपछि बेपत्ता भएका थिए । घटनाको जानकारी प्राप्त भएपछि सिङ्गटी बेसबाट सशस्त्र प्रहरी नायब निरीक्षक शेखर कार्कीको कमान्डमा उद्धार टोली परिचालन गरिएको थियो ।

विकट तथा जोखिमपूर्ण भू–भागमा रहेको उक्त भीरको करिब ७०० मिटर तलबाट सशस्त्र प्रहरीको टोलीले निमराजको शव फेला पारेको हो । शव फेला परेपछि प्रहरीले आवश्यक कानुनी प्रक्रिया पूरा गरेको जनाएको छ ।

सशस्त्र प्रहरीका अनुसार मुचुल्का लगायतका कानुनी प्रक्रिया सम्पन्न गरी शव मृतकका आफन्तलाई बुझाइसकिएको छ। 

यस घटनाले जलविद्युत आयोजनामा कार्यरत श्रमिकहरूको कार्यस्थल सुरक्षा र जोखिम व्यवस्थापनका विषयमा पुनः ध्यानाकर्षण गराएको छ । सुवाश बस्नेत/ दोलखा