किएभ – रुसले रातभर युक्रेनका विभिन्न सहरमा गरेको व्यापक हवाई आक्रमणमा कम्तीमा २२ जनाको मृत्यु भएको छ भने १३८ जना घाइते भएका छन्। सयौँ ड्रोन र दर्जनौँ क्षेप्यास्त्र प्रयोग गरी गरिएको आक्रमणले राजधानी किएभसहित मध्य तथा पूर्वी युक्रेनका धेरै क्षेत्रमा ठूलो जनधनको क्षति पुर्‍याएको छ।

युक्रेनी अधिकारीहरूका अनुसार डिनिप्रो सहरमा १६ जनाको मृत्यु भएको छ भने किएभमा ६ जनाले ज्यान गुमाएका छन्। उद्धारकर्मीहरूले भग्नावशेषबाट एक तीन वर्षीया बालिका, एक महिला र उनका आठ वर्षीय छोराको शव फेला पारेका छन्। आक्रमणका कारण धेरै आवासीय भवन ध्वस्त भएका छन् भने खोज तथा उद्धार कार्य जारी छ।

युक्रेनी वायु सेनाका अनुसार रुसले ७३ वटा क्षेप्यास्त्र र ६५६ वटा ड्रोन प्रहार गरेको थियो। तीमध्ये ४० वटा क्षेप्यास्त्र र ६०२ वटा ड्रोन नष्ट वा निष्क्रिय पारिएको दाबी गरिएको छ। आक्रमणको लक्ष्य किएभ, डिनिप्रो, पोल्टावा, खार्किभ र जापोरिझिया क्षेत्रहरू रहेका थिए।

राजधानी किएभका सैन्य प्रशासन प्रमुख तिमुर टाकाचेन्कोका अनुसार राजधानीमा मात्रै ८१ जना घाइते भएका छन्। आक्रमणबाट आवासीय भवन, ऊर्जा संरचना तथा अन्य नागरिक पूर्वाधारमा गम्भीर क्षति पुगेको छ।

युक्रेनी राष्ट्रपति भोलोडिमिर जेलेन्स्कीले अन्तर्राष्ट्रिय समुदायसँग थप सहयोगको अपिल गर्दै पर्याप्त सुरक्षा सहायता नपाए यस्ता आक्रमण दोहोरिन सक्ने चेतावनी दिएको छ। युक्रेनले अमेरिकी हतियार आपूर्तिमा आएको कमीका कारण ब्यालेस्टिक क्षेप्यास्त्रको जोखिम बढेको जनाएको छ।

यता रुसी रक्षा मन्त्रालयले भने किएभसहित विभिन्न क्षेत्रका सैन्य तथा औद्योगिक संरचनालाई लक्षित गरी आक्रमण गरिएको दाबी गरेको छ। तर युक्रेनले अधिकांश क्षति आवासीय तथा नागरिक संरचनामा पुगेको जनाएको छ।

विश्लेषकहरूका अनुसार युद्ध चौथो वर्षमा प्रवेश गरिरहँदा दुवै पक्षबीच रणनीतिक दबाब बढ्दै गएको छ। युक्रेनले रुसी आपूर्ति मार्ग र ऊर्जा संरचनामा आक्रमण तीव्र बनाइरहेको छ भने मस्कोले हवाई अभियानलाई अझ व्यापक बनाएको देखिएको छ।

अमेरिकाको मध्यस्थतामा भएका शान्ति प्रयासहरू अहिलेसम्म निष्कर्षमा पुग्न सकेका छैनन्। युद्धविरामका विषयमा दुवै पक्षबीच गहिरो मतभेद कायम रहेको बताइएको छ।

डिनिप्रोका मेयर  बोरिस फिलाटोभले मृतकहरूको सम्मानमा सहरभर शोक घोषणा गरेका छन्। आक्रमणपछि पनि केही क्षेत्रमा ड्रोन आक्रमण जारी रहेकाले जनजीवन थप असुरक्षित बनेको जनाइएको छ।