एजेन्सी- अफगानिस्तानविरुद्धको तीन खेलको एकदिवसीय क्रिकेट सिरिजमा वेष्ट इण्डिजले क्लिन स्वीप गरेको छ ।

भारतको लखनउमा सोमबार भएको तेस्रो तथा अन्तिम एकदिवसीयमा ५ विकेट जित निकाल्दै वेष्ट इण्डिजले सिरिज ३-० ले जित हासिल गरेको हो ।

अफगानिस्तानले दिएको २ सय ५० रनको लक्ष्य वेष्ट इण्डिजले ४८ ओभर ४ बलमा मात्र ५ विकेट गुमाएर पुरा गर्यो । वेष्ट इण्डिजको जितमा साई होपले १ सय ९ रनको शतकीय इनिङ्स खेले ।

यस्तै रोस्टन लामरले अविजित ४२, ब्राण्डन किङले ३९ तथा कप्तान केइरन पोलार्डले ३२ रन बनाए । अफगानिस्तानका मुजिब उर रहमानले २ विकेट लिए ।

यस अघि टस हारेर पहिले ब्याटिङ गरेको अफगानिस्तानले ५० ओभरमा ७ विकेट गुमाएर २ सय ४९ रन बनाएको थियो ।

अफगानिस्तानका लागि कप्तान अस्घर अफगानले ८६ रनको अर्धशतकीय इनिङ्स खेले । यस्तै हजरत उल्लाह जाजई र मोहमद नाबीले समान ५० रन बनाए । वेष्ट इण्डिजका केमो पाउलले ३ तथा अल्जारी जोसेपले २ विकेट लिए ।

सिरिज अन्तर्गत पहिलो खेल वेष्ट इण्डिजले ७ र दोस्रो खेल ४७ रनको जित निकालेको थियो ।