काठमाडौं – प्रधानमन्त्री बालेन्द्र शाहले सङ्घीय संसद्मा दिएको सीमा सम्बन्धी अभिव्यक्तिको विरोध गर्दै राष्ट्रिय युवा सङ्घ नेपाल र अनेरास्ववियुले आइतबार साँझ मसाल जुलुससहित प्रदर्शन गरेका छन् ।

प्रधानमन्त्री शाहले संसद्मा सम्बोधनका क्रममा नेपालले पनि भारतको सीमा अतिक्रमण गरेको आशयको अभिव्यक्ति दिएको भन्दै युवा तथा विद्यार्थी संगठनहरूले त्यसको विरोधमा सडक प्रदर्शन गरेका हुन् ।

प्रदर्शनकारीहरूले प्रधानमन्त्रीको भनाइ राष्ट्रिय हित, स्वाधीनता र भौगोलिक अखण्डताविरुद्ध रहेको आरोप लगाउँदै उक्त अभिव्यक्ति तत्काल फिर्ता लिन माग गरेका छन् । उनीहरूले नाराबाजी गर्दै सरकारको ध्यानाकर्षण गराएका थिए ।

युवा सङ्घ र अनेरास्ववियुका नेताहरूले नेपालको सीमा सम्बन्धी विषयमा प्रधानमन्त्रीबाट आएको अभिव्यक्ति गैरजिम्मेवार भएको दाबी गर्दै राष्ट्रिय भावनामाथि चोट पुगेको बताएका छन् । उनीहरूले विवादित भनाइ सच्याउन र जनतासमक्ष स्पष्ट धारणा सार्वजनिक गर्नसमेत आग्रह गरेका छन्।