काठमाडौं – नेपाली कम्युनिस्ट पार्टी (नेकपा)का केन्द्रीय सदस्य सुदेश पराजुलीले पार्टी नेतृत्व र संगठन सञ्चालन शैलीप्रति सार्वजनिक रूपमा असन्तुष्टि व्यक्त गरेका छन्।

पराजुलीले सामाजिक सञ्जाल फेसबुकमार्फत पार्टीको वर्तमान अवस्था र कार्यशैलीप्रति निराशा प्रकट गर्दै संगठन सञ्चालनको तरिकामाथि प्रश्न उठाएका हुन्।

उनले पार्टीभित्रका समस्याबारे खुला रूपमा बोल्न र लेख्न अनुकूल वातावरण नरहेको संकेत गर्दै फेसबुकमा लेखेका छन्, ‘नबोलौँ, नलेखौँ भन्यो तर हेर्दाहेर्दै बैराग लाग्ने अवस्था देखिन्छ। नेपाली कम्युनिस्ट पार्टीको संगठन सञ्चालनको तरिका हेर्दा लाग्छ, भिरमा लड्ने गोरुलाई रामरामबाहेक के नै भन्न सकिन्छ र। हाम्रै कर्मले बन्यो, हाम्रै बर्मले सक्नेछौँ भनेजस्तो हुँदैछ।’

पराजुलीको उक्त अभिव्यक्तिलाई पार्टी नेतृत्व र संगठन सञ्चालनप्रतिको असन्तुष्टिको रूपमा हेरिएको छ। उनको टिप्पणी सार्वजनिक भएपछि पार्टीभित्र नेतृत्वको कार्यशैली, संगठन सुदृढीकरण तथा आन्तरिक व्यवस्थापनबारे नयाँ बहस सुरु भएको छ।

पछिल्लो समय नेकपाभित्र संगठन सुदृढीकरण, कार्यशैली र नेतृत्वको भूमिकालाई लिएर विभिन्न तहमा छलफल र बहस चलिरहेका बेला केन्द्रीय सदस्यकै यस्तो सार्वजनिक टिप्पणी आएको हो।

यद्यपि, पराजुलीले आफ्नो टिप्पणीमा कुनै नेता, पदाधिकारी वा निर्णयलाई प्रत्यक्ष रूपमा लक्षित गरेका छैनन्। पार्टी नेतृत्वबाट उनको अभिव्यक्तिबारे हालसम्म कुनै औपचारिक प्रतिक्रिया आएको छैन।