काठमाडौं– विपक्षी दलका सांसदहरूले सरकारले ल्याएको बजेट वास्तविक नदेखिएको टिप्पणी गरेका छन् ।  

शुक्रबार बजेट आएपछि सञ्चारकर्मीसंग कुरा गर्दै उनीहरूले अहिलेको बजेटका आधार निकै बढी रहेकाले वास्तविक नदेखिएको जनाएका हुन् ।

नेपाल कम्युनिस्ट पार्टी (नेकपा)का सांसद वर्षमान पुनले योजना आयोगको सिलिङ भन्दा बढी आएको बजेट वास्तविक नदेखिएको बताए ।

उनले अर्थतन्त्रले धान्ने नसक्ने गरी वितरणमुखी बजेट देखिएको उल्लेख गरे । स्थानीय तहको चुनावलाई लक्षित गर्दै जनमत बनाउने मनोविज्ञानका साथ बजेट ल्याएको जस्तो देखिएको उनको भनाइ छ ।

त्यस्तै एमाले सांसद गुरु बरालले आधारभूत वर्गका लागि अवसर वृद्धि गर्ने खालका योजना र कार्यक्रमहरू समेट्न नसकेको बताए । उनले मध्यम वर्गलाई विस्तार गर्नेगरी ढोका खोल्न नसकेको जिकिर गरे ।

त्यस्तै कांग्रेस सांसद निश्कल राईले जनतालाई निरुत्साहित गर्ने गरी बजेट आएको टिप्पणी गरे ।

त्यस्तै राप्रपा र श्रम संस्कृतिका सांसदहरूले पनि सरकारको बजेट आशामूखी नभएको आरोप लगाएका छन् ।