काठमाडौं– नेपाल–भारत सीमा विवाद बढ्दै गएपछि दुई मुलुकबीच सचिवस्तरीय बैठक हुने भएको छ ।

सीमा विवादका कारण नेपालमा भारत विरोधी गतिविधिले तीव्रता पाएसँगै भारत सचिवस्तरीय बैठक गर्न सहमत भएको स्रोतले बतायो ।

दुई मुलुकका परराष्ट्र सचिवस्तरीय बैठक आगामी दुई साताभित्र हुने परराष्ट्र मन्त्रालय स्रोतले बताएको छ । यो विषयमा आइतबार कुटनीतिक च्यानलबाट अनौपचारिक छलफल भएको हो ।

बैठकको मिति तय गर्ने विषयमा औपचारिक छलफलको तयारी भइरहेको स्रोतको भनाइ छ ।

भारतका लागि नेपाली राजदूत नीलाम्बर आचार्यले भारतीय विदेश मन्त्रालयका उच्च अधिकारीसँग भेट गरी वार्ताको पहल गरेको परराष्ट्रका अधिकारीले बताएका छन् ।

काठमाडौंमा २०७१ साउनमा भएको नेपाल–भारत संयुक्त आयोगको तेस्रो बैठकले परराष्ट्रसचिवस्तरमा सीमा विवाद सल्टाउन भन्दै जिम्मेवारी तोकेको थियो ।

त्यसपछि त्यो स्तरमा सीमाका विषयमा छलफल हुन सकेको छैन ।

यस्तै, सीमाका विषयमा सीमा सुरक्षा हेर्दै आएको सशस्त्र प्रहरी र भारतीय सीमा सुरक्षा बल (एसएसबी) बीच आगामी मंसिर ४ देखि ६ गतेसम्म काठमाडौंमा द्विपक्षीय छलफल हुने पनि जनाइएको छ ।