काठमाडौं–  इजरायलका प्रधानमन्त्री बेन्जामिन नेतन्याहुँले गाजाको थप भू-भाग कब्जा गर्न सेनालाई निर्देशन दिएका छन् । बिहीबार दिएको अभिव्यक्तिमा उनले प्रारम्भिक चरणमा गाजाको करिब ७० प्रतिशत क्षेत्र आफ्नो नियन्त्रणमा ल्याउने लक्ष्य रहेको बताएका हुन्।

समाचार एजेन्सी रोयटर्सका अनुसार यो कदम इजरायल र हमासबीच सन् २०२५ अक्टोबरमा भएको युद्धविराम सम्झौताविपरीत मानिएको छ।

हाल गाजाका अधिकांश बासिन्दा समुद्री तट नजिकको सानो क्षेत्रमा सीमित हुन बाध्य भएका छन् । विभिन्न अन्तर्राष्ट्रिय अनुमानअनुसार इजरायलले यसअघि नै गाजा पट्टीको करिब ६४ प्रतिशत भूभागमा प्रभावकारी नियन्त्रण कायम गरिसकेको छ।

सन् २०२३ मा दक्षिणी इजरायलमा हमासले गरेको आक्रमणपछि सुरु भएको युद्ध दुई वर्षदेखि जारी छ । त्यसयता इजरायली सैन्य कारबाहीका कारण गाजाको ठूलो हिस्सा ध्वस्त बनेको छ भने मानवीय संकट पनि गहिरिँदै गएको छ।

 गाजा पट्टीमा जारी युद्धका कारण हजारौं मानिस विस्थापित भएका छन् भने खाद्य, स्वास्थ्य र आधारभूत सेवामा गम्भीर संकट देखिएको अन्तर्राष्ट्रिय निकायहरूले बताएका छन्।