काठमाडौं – राष्ट्रिय स्वतन्त्र पार्टी (रास्वपा)का सांसद राजिव खत्रीले राष्ट्रिय मानव अधिकार आयोगले आफ्नो नाम प्रतिवेदनमा समावेश गरेको विषयप्रति कडा आपत्ति जनाएका छन् । उनले आयोगको प्रतिवेदनलाई लिएर सामाजिक सञ्जालमार्फत विस्तृत प्रतिक्रिया दिएका हुन् ।

खत्रीले आफूले सुन तस्करी, रक्तचन्दन, खाग, बालुवा, काठ तथा मानव तस्करीलगायतका अवैध गतिविधि र राजनीतिक–आर्थिक बेथितिविरुद्ध आवाज उठाउँदै आएको दाबी गरेका छन् । साथै, उनले नेताका छोराछोरीसँग जोडिएका कथित कुकर्म र भ्रष्टाचारविरुद्धको अभियानलाई समेत आफूले समर्थन गरेको उल्लेख गरेका छन् ।

उनले जेन–जी पुस्ताको शान्तिपूर्ण आन्दोलन र भ्रष्टाचारविरुद्धको खबरदारीलाई समर्थन गरेको उल्लेख गर्दै युवाहरूलाई सचेत रहन आग्रह गरेका छन् ।

मानव अधिकार आयोगले आफ्नो नामसमेत अनुसन्धानका लागि उल्लेख गरेको विषयप्रति आपत्ति जनाउँदै खत्रीले निष्पक्ष छानबिनको माग गरेका छन् । उनले आफूबाटै अनुसन्धान सुरु गर्न आग्रह गर्दै, यदि कुनै संलग्नता पुष्टि भए जुनसुकै कानुनी कारबाही भोग्न तयार रहेको स्पष्ट पारेका छन् ।