फिक्कल– इलामको माङसेबुङ गाउँपालिकाले लिम्बू भाषालाई औपचारिक रूपमा सरकारी कामकाजको भाषाका रूपमा लागू गरेको छ।

गाउँपालिकाको २०८३ वैशाख ११ गते सम्पन्न ६६औँ कार्यपालिका बैठकको निर्णयअनुसार मंगलबारदेखि लिम्बू भाषा कार्यान्वयनमा ल्याइएको हो।

संविधानको भाषा तथा संस्कृतिसम्बन्धी मौलिक हक, स्थानीय सरकार सञ्चालन ऐन २०७४ र स्थानीय तहलाई प्राप्त अधिकार प्रयोग गर्दै गाउँपालिकाले लिम्बू भाषालाई कामकाजी भाषाका रूपमा लागू गरेको जनाएको छ।

कोशी प्रदेश प्रमुख परशुराम खापुङको प्रमुख आतिथ्यतामा गाउँपालिका अध्यक्ष हेमन्त राईले लिम्बू भाषालाई औपचारिक रूपमा सरकारी कामकाजको भाषाका रूपमा लागू गरिएको घोषणा वाचन गरेका थिए।

गाउँपालिकाका अनुसार बहुसङ्ख्यक लिम्बू समुदायले बोल्ने यो भाषा किरात सिरिजङ्गा लिपिमा लेखिनेछ। घोषणा पछि माङसेबुङ गाउँपालिका र साम्जिक मुन्धुम आधारभूत विद्यालयबीच भएको एक सम्झौतापत्र पनि लिम्बू भाषा र लिपिमै तयार गरी हस्ताक्षर गरिएको छ।

सम्झौतापत्रमा गाउँपालिकाका तर्फबाट निमित्त प्रमुख प्रशासकीय अधिकृत बुद्धिप्रसाद खतिवडा र विद्यालयका प्रधानाध्यापक कल्पना लिम्बूले हस्ताक्षर गरेका हुन्।

गाउँपालिका उपाध्यक्ष विनोदकुमार नेम्बाङले ७५३ स्थानीय तहमध्ये लिम्बू भाषालाई कामकाजी भाषाका रूपमा लागू गर्ने माङसेबुङ पहिलो गाउँपालिका भएको दाबी गरेका छन्।

लिम्बू भाषा सरकारी कामकाजी भाषाका रूपमा लागू भएपछि स्थानीय सरोकारवालाहरूले सकारात्मक प्रतिक्रिया दिएका छन्। किरात याक्थुङ चुम्लुङका केन्द्रीय सल्लाहकार मोहनसिंह थेवेले यो निर्णय मातृभाषा संरक्षणका लागि महत्वपूर्ण कदम भएको बताएका छन्।

राष्ट्रिय जनगणना २०७८ अनुसार माङसेबुङ गाउँपालिकामा १६ हजार ८१० जनसङ्ख्या रहेको छ। यहाँ ४२.८३ प्रतिशत लिम्बू र ३३.६ प्रतिशत राई समुदायको बसोबास छ।