एजेन्सी– भेनेजुएलामा जारी राजनीतिक संकटका विषयमा अमेरिकासँग द्विपक्षीय वार्ता गर्न तयार रहेको रुसले जनाएको छ । रोल…
रुसी विदेशमन्त्री सेर्गेई लाभ्रोभले अमेरिकी विदेशमन्त्री माइक पोम्पेओसँगको टेलिफोन वार्ताका क्रममा रुस भेनेजुएलाका विषयमा अमेरिकासँग द्विपक्षीय वार्ता गर्न तयार रहेको जनाएका हुन् ।

रुसको विदेश मन्त्रालयले जारी गरेको विज्ञप्तिमा भेनेजुएलाको भविष्य निर्धारण गर्ने जिम्मा भेनेजुएलाका जनताको हातमा मात्रै रहेको रुसी विदेश मन्त्रालयको भनाइ छ । भेनेजुएलामा जारी राजनीतिक संकटका विषयमा अमेरिकाले रुससमक्ष द्विपक्षीय वार्ता गर्ने प्रस्ताव गरेको भन्दै रुसी विदेशमन्त्रालयले अमेरिकाको प्रस्ताव स्वीकार्य रहेको र भेनेजुएलाको विषयमा अमेरिकासँग द्विपक्षीय वार्ता गर्न रुस तयार रहेको जनाइएको छ ।

गत जनवरी २३ मा भेनेजुएलाका विपक्षी नेता हुआँ गुआइदोले आफूले आफैँलाई राष्ट्रपति घोषणा गरेयता भेनेजुएलाको विषयलाई लिएर रुस र अमेरिका दुई फरक कित्तामा उभिएका छन् । अमेरिकाले हुआँ गुआइदोलाई भेनेजुएलाको आधिकारिक राष्ट्रपतिको मान्यता दिएको छ भने रुसले निकोलस मादुरोलाई नै राष्ट्रपतिको मान्यता दिएको छ ।