काठमाडौँ- नेपाल विद्युत् प्राधिकरणले तीव्र हावाहुरीका कारण प्रसारण लाइनमा रुख ढल्दा देशका केही क्षेत्रमा विद्युत् आपूर्तिमा अवरोध भएको जनाएको छ।

यसका कारण देशका केही क्षेत्रमा भोल्टेजमा उतारचढाव र ट्रिपिङको समस्या देखिएपछि समाधानका लागि प्राविधिक टोलीलाई परिचालन गरिएको प्राधिकरणले जानकारी दिएको छ ।

प्राधिकरणका प्रवक्ता राजन ढकालले प्रसारण लाइनमा परेको प्रभावपछि प्राविधिक टोलीलाई परिचालन गरेर समाधान गर्दै अघि बढिरहेको जानकारी दिए ।

‘पिलुवा (पथलैया)– चन्द्रनिगाहपुर खण्डको टावर नम्बर १२२–१२३ को बीचमा ढलेको रुख हटाइसकिएको छ । हाल सर्किट चार्ज गर्ने प्रक्रिया अघि बढाइएको छ,’ ढकालले भने, ‘त्यसैगरी टावर नम्बर १३६ र १३७ बीचमा ढलेका तीन रुख प्राधिकरणले शनिबार राति नै हटाई विद्युत प्रवाह सुचारू गरिएको छ ।’

उन अमलेखगञ्ज–कमने खण्डको टावर नम्बर ४६ र ४७ को बीचमा रुख ढल्दा एचटीएलएस कन्डक्टरमा क्षति पुगेको बताए।

यो प्राविधिक रुपमा जटिल समस्या भएकाले समाधानका लागि प्राधिकरणको एचटीएलएस विशेषज्ञसहितको प्राविधिक टोली आइतबार बिहानै अमलेखगञ्ज–कमाने घटनास्थलमा पुगेर स्ट्रिङिङको काम सुरू गरिसकेको उनले बताए।