एजेन्सी– अमेरिका र इरानबीच जारी उच्चस्तरीय वार्ता अन्तिम चरणमा पुगेको बताइएको छ । अमेरिकी राष्ट्रपति कार्यालयले सम्भावित सम्झौताबारे अन्तिम निर्णय आउन अझै केही दिन लाग्न सक्ने जनाएको छ ।

आइतबार सार्वजनिक एक अन्तर्राष्ट्रिय सञ्चारमाध्यमको रिपोर्टअनुसार, प्रस्तावित सम्झौताले इरानको नेतृत्व तहबाट औपचारिक स्वीकृति प्राप्त गर्न बाँकी रहेको र त्यसका लागि थप समय आवश्यक पर्न सक्ने उल्लेख गरिएको छ ।

रिपोर्टमा उद्धृत एक वरिष्ठ अमेरिकी अधिकारीका अनुसार दुवै पक्षबीच वार्ता सकारात्मक दिशातर्फ अघि बढिरहेको छ । उहाँले केही दिनभित्रै सम्झौता टुंगोमा पुग्ने अपेक्षा गरिएको जानकारी दिए । यद्यपि, सम्झौता अझै अन्तिम चरणमै रहेकाले सबै प्रक्रिया पूरा भएपछि मात्र औपचारिक घोषणा गरिने बताइएको छ ।

सम्भावित सम्झौताले मध्यपूर्व क्षेत्रमा शान्ति स्थापनासँगै इरानको आणविक कार्यक्रमसम्बन्धी अन्तर्राष्ट्रिय चासोलाई सम्बोधन गर्न सहयोग पुग्ने अपेक्षा गरिएको छ । तर, सम्झौताका विस्तृत बुँदाहरू भने अहिलेसम्म सार्वजनिक गरिएको छैन ।

अमेरिकी राष्ट्रपति  डोनाल्ड ट्रम्पले पनि आफ्ना प्रतिनिधिहरूलाई वार्तामा धैर्यता र सावधानी अपनाउन निर्देशन दिएको जनाइएको छ । उनले दुवै पक्षले पर्याप्त समय लिएर सोचविचारपूर्वक निर्णयमा पुग्नुपर्ने धारणा व्यक्त गर्नुभएको बताइएको छ ।

यसैबीच, अमेरिकाले इरानका बन्दरगाहहरूमाथि लागू गरेको नाकाबन्दी भने सम्झौता औपचारिक रूपमा स्वीकृत, प्रमाणित र हस्ताक्षर नभएसम्म यथावत् रहने जानकारी दिएको छ ।