जनकपुरधाम– उच्च अदालत जनकपुरमा कर्मचारीले सरसफाइ अभियान थालेका छन् । 

अदालतका मुख्य न्यायाधीश टेक नारायण कुँवरको नेतृत्वमा शुक्रबार जनकपुर उच्च अदालत अगाडिको सडक क्षेत्रमा संयुक्त सरसफाइ अभियान चलाइएको हो । 

‘स्वच्छ, सफा, नमूना मार्ग बनाऔँ’ भन्ने नारासहित आयोजित अभियानमा उच्च र जिल्ला अदालतका न्यायाधीशहरू, जनकपुरधाम उपमहानगरपालिका वडा कार्यालय, नेपाल बार एसोसिएसन, नेपाल पत्रकार महासंघ र सुरक्षा निकायका  प्रतिनिधि सहभागी थिए । 

सरसफाइ अभियानमार्फत सार्वजनिक स्थानलाई स्वच्छ राख्ने तथा वातावरण संरक्षणप्रति नागरिकमा सचेतना अभिवृद्धि गर्ने उद्देश्य रहेको आयोजकले जनाएको छ। 

सहभागीहरूले नियमित सरसफाइ र सामूहिक सहभागिताले मात्र स्वच्छ समाज निर्माण सम्भव हुने बताएका छन् । मुख्य न्यायाधीश कुँवरले सफाइ अभियानलाई सबैले साथ दिएर  नगर सफा राख्नुपर्ने बताए ।