काठमाडौं– नेपाल मगर संघको १३ औँ राष्ट्रिय महाधिवेशन यही जेठ ८ गतेदेखि काठमाडौंमा आयोजना हुने भएको छ ।  

संघले बुधबार काठमाडौंमा पत्रकार सम्मेलन गर्दै ‘मगरात सभ्यता सहितको समृद्ध मगर समाज’ भन्ने मूल नारासहित जेठ ८ गतेदेखि १० गतेसम्म महाधिवेशन आयोजना गर्न लागिएको जनाएको हो । 

महाधिवेशन उद्घाटन समारोह जेठ ८ गते बिहान ११ बजे काठमाडौंको प्रज्ञा प्रतिष्ठानमा हुने र बन्दसत्र नेपाल पुलिस क्लवमा हुने आयोजकले जनाएको छ ।

महाधिवेशनले संघको नयाँ कार्यसमिति समेत चयन गर्ने अध्यक्ष ज्ञानेन्द्र पुन मगरले जानकारी दिए । मगर समुदायको हकहित, सामाजिक एकता, सांस्कृतिक संरक्षण तथा समृद्ध समाज निर्माणका लागि आगामी कार्यदिशा तय गर्ने उनले बताए । 

महाधिवेशनमा देशभरबाट प्रतिनिधि, पर्यवेक्षक, विभिन्न जिल्लाका प्रतिनिधि तथा बुद्धिजीवी, सामाजिक अभियन्ता तथा विभिन्न क्षेत्रका व्यक्तित्वहरूको सहभागिता रहने आयोजकले जनाएको छ।