काठमाडौं – यूएईको अबुधाबीस्थित अल धफरा क्षेत्रमा रहेको बराकाह आणविक ऊर्जा केन्द्र बाहिर ड्रोन हमला भएपछि एक विद्युत् जेनेरेटरमा आगलागी भएको छ। घटनापछि उक्त क्षेत्रमा सुरक्षा सतर्कता बढाइएको छ ।

अबुधाबी मिडिया अफिसका अनुसार आगलागीबाट कुनै मानवीय क्षति भएको छैन । साथै, बराकाह आणविक ऊर्जा केन्द्रको सुरक्षा प्रणाली तथा रेडिएसन स्तरमा पनि कुनै असर नपरेको बताइएको छ । अधिकारीहरूले केन्द्रका सबै आवश्यक उपकरण र प्रणाली सामान्य रूपमा सञ्चालनमा रहेको जानकारी दिएका छन् ।

समाचार एजेन्सी एपीका अनुसार घटनाको जिम्मेवारी अहिलेसम्म कुनै संगठन वा देशले लिएको छैन । तर पछिल्लो क्षेत्रीय तनावलाई मध्यनजर गर्दै इरानमाथि आशंका गरिएको छ ।

पछिल्ला दिनहरूमा इरानले यूएईलाई लगातार चेतावनी दिँदै आएको छ । युद्धको अवस्थाबीच यूएईमा इजरायलको हवाई प्रतिरक्षा प्रणाली तथा अमेरिकी सैनिकहरूको उपस्थितिलाई पनि महत्वपूर्ण रूपमा हेरिएको छ ।

यता, क्षेत्रीय तनावका बीच पनि होर्मुज जलडमरूमध्य हुँदै ऊर्जा आपूर्ति भने जारी रहेको छ । मार्शल आइल्यान्ड्सको झण्डा बोकेको एलपीजी ट्यांकर ‘सिमी’ २० हजार टन एलपीजी बोकेर भारतको काण्डला बन्दरगाह सुरक्षित रूपमा पुगेको छ ।

एएनआईका अनुसार युद्ध सुरु भएयता हालसम्म १५ वटा एलपीजी जहाज भारत पुगिसकेका छन् । ‘सिमी’ ट्यांकरले मे १३ मा होर्मुज जलडमरूमध्य पार गरेको थियो। त्यस्तै भारततर्फ आउँदै गरेको ‘एमभी सनसाइन’ नामक अर्को एलपीजी जहाजले पनि हालै सुरक्षित रूपमा होर्मुज जलडमरूमध्य पार गरेको बताइएको छ ।

मध्यपूर्वमा बढ्दो तनावसँगै ऊर्जा आपूर्ति, समुद्री सुरक्षा तथा आणविक केन्द्रहरूको सुरक्षालाई लिएर अन्तर्राष्ट्रिय चासो बढ्दै गएको छ ।